Vetëm në një periudhë të shkurtër janë bërë publike dy procedura prokurimi që ngrenë pikëpyetje serioze dhe meritojnë një verifikim të plotë nga organet ligjzbatuese.
Rasti i parë është tenderi për rikonstruksionin e qendrës së fshatit Vranisht (Loti II), me një fond limit prej 40 milionë lekësh. Në garë morën pjesë vetëm dy operatorë ekonomikë dhe fitues u shpall bashkimi i operatorëve “T&J Construction” shpk dhe “Valona Konstruksion” shpk, me një ofertë prej 38.8 milionë lekësh pa TVSH, shumë pranë fondit limit. Qytetarët kanë të drejtë të pyesin: si është përllogaritur kjo vlerë dhe a përputhen kostot me punimet që do të kryhen?
Rasti i dytë është tenderi për rehabilitimin e sheshit Kuç Buronja, rikonstruksionin e urës dhe pyllëzimin e sheshit, me një fond limit rreth 25 milionë lekë. Procedura u zhvillua me vetëm një ofertues, ndërsa fitues u shpall kompania “RSM Company”, me një ofertë prej 23.839.437 lekësh pa TVSH. Mungesa e konkurrencës në një procedurë të hapur është një element që meriton të paktën verifikim, për të sqaruar nëse janë respektuar parimet e konkurrencës dhe të barazisë.
Askush nuk po kërkon që dikush të shpallet fajtor pa prova. Por kur kemi tenderë me oferta shumë pranë fondit limit ose me një konkurrent të vetëm, është normale që qytetarët të kërkojnë transparencë dhe institucionet të ushtrojnë kontroll.
Prandaj lind pyetja: çfarë pret akoma SPAK? Nëse gjithçka është bërë sipas ligjit, një hetim do ta vërtetojë. Nëse ka shkelje, përgjegjësit duhet të mbajnë përgjegjësi.
Paratë publike janë të qytetarëve, jo të pushtetarëve. Çdo milion i shpenzuar duhet të jetë i justifikuar, transparent dhe i kontrollueshëm. Heshtja përballë dyshimeve nuk forcon besimin te institucionet; përkundrazi, e dëmton atë. Pikërisht për këtë arsye, një verifikim i plotë i këtyre procedurave do të ishte në interes të ligjit, të transparencës dhe të vetë qytetarëve./Timoni.al
