Vendimi për përjashtimin me 60 ditë nga punimet e Kuvendit të deputetëve të Partisë Demokratike, Gazment Bardhi dhe Klevis Balliu, ka shkaktuar reagime të forta në radhët e opozitës. Masa disiplinore u mor nga Komisioni i Etikës pas incidenteve të regjistruara në Parlament gjatë votimit të reformës territoriale.
Pas vendimit, Klevis Balliu e cilësoi masën si të pajustifikuar dhe akuzoi mazhorancën se po përdor mekanizmat parlamentarë për të kufizuar reagimin e opozitës. Ai pretendoi se përjashtimi i tij dhe i Bardhit është bërë me urdhër të kryeministrit Edi Rama.
Në deklaratën për mediat, deputeti demokrat ironizoi arsyetimin lidhur me përdorimin e vezëve gjatë incidenteve në Kuvend, duke kundërshtuar interpretimin se bëhet fjalë për lëndë piroteknike. Sipas Balliut, masa e marrë ndaj dy deputetëve synon të pengojë debatin dhe të ndëshkojë qëndrimet e opozitës.
Ai pretendoi gjithashtu se incidenti nisi me hedhjen e një shisheje nga ana e një përfaqësuesi të Partisë Socialiste drejt kreut të grupit parlamentar të PD-së, Gazment Bardhi. Sipas tij, për këtë veprim nuk është marrë masë ndaj asnjë deputeti të mazhorancës.
Balliu e konsideroi vendimin si një standard të dyfishtë në trajtimin e incidenteve parlamentare dhe deklaroi se opozita do ta ankimojë atë. Në mbështetje të qëndrimit të tij, ai iu referua edhe proceseve të mëparshme gjyqësore, për të cilat tha se kanë përfunduar në favor të palës së tij.
“Minimalisht të na kursenin idiotësirat dhe të thonë të vërtetën që na kanë urdhëruar që ne t’ju përjashtojmë dy muaj, sepse ju goditët me vezë lartmadhërinë e tij”, deklaroi Balliu, duke akuzuar kryeministrin Rama se qëndron pas vendimit.
Deputeti demokrat u shpreh se do të vijojë kundërshtimin e masës, ndërsa kërkoi që për më shumë hollësi mbi aspektet procedurale të vendimit të dëgjohen edhe përfaqësuesit e PD-së në Komisionin e Etikës.
