Prej vitesh, Shqipëria ka një ligj për të drejtën e informimit, i cili në letër detyron institucionet publike të japin informacion për qytetarët dhe mediat.
Ligji është bërë për një arsye të thjeshtë: Që institucionet të mos sillen si pronarë të informacionit publik dhe çdo qytetar apo gazetar të ketë mundësi të mësojë çfarë ndodh me një tender, fond, projekt, procedurë apo ngjarje me interes publik.
Dikur, shumë institucione as nuk e vrisnin mendjen për këtë ligj. Nuk përgjigjeshin fare. Por rruga drejt BE-së, presioni i organizatave, ambasadave dhe nevoja për të plotësuar disa kritere, i detyroi të paktën të kthenin përgjigje.
Vetëm se tani i kanë gjetur çelësin edhe kësaj pune: Përgjigjen, por pa dhënë përgjigje.
Ti i pyet për një tender, ata të thonë se “është zhvilluar sipas procedurave ligjore”. A thua se gazetari po pyet nëse tenderi është bërë me kriteret e Kanunit të Maleve.
Kështu ka vepruar edhe Drejtoria e Përgjithshme e Policisë së Shtetit, në një përgjigje të kthyer përSkyweb.al lidhur me tenderët e jelekëve antiplumb dhe pajisjeve mbrojtëse të efektivëve.
Kërkesa u bë pas vrasjes tragjike të efektivit Enea Mekolli në Maliq dhe deklaratës së kreut të Policisë së Shtetit, Skënder Hita, se plumbi fillimisht kishte çarë antiplumbin e policit dhe më pas kishte depërtuar në trup, duke i shkaktuar vdekjen.
Pra, nuk po flitej për një kuriozitet dosido. Po flitej për pajisjet që duhet të mbrojnë jetën e punonjësve të Policisë së Shtetit në operacione të rrezikshme.
Skyweb.al pyeti Policinë se si blihen jelekët antiplumb, çfarë standardi përdorin efektivët në operacione të rrezikshmërisë së lartë, sa tenderë janë zhvilluar në 5 vitet e fundit, cilat kompani kanë fituar, çfarë standardi mbrojtjeje kanë jelekët, sa është afati teknik i përdorimit dhe nëse pajisjet aktuale janë ende brenda këtij afati.
Pyetje të thjeshta, që lidhen me jetën e policëve.
Por përgjigjja e Policisë së Shtetit ishte një model se si mund të tallesh me ligjin, me median dhe me publikun, duke përdorur logo dhe vulë zyrtare.
Policia thotë se blerja e jelekëve antiplumb bëhet përmes procedurave të prokurimit publik, në përputhje me legjislacionin në fuqi, konkretisht me ligjin për prokurimet në fushën e mbrojtjes dhe sigurisë dhe VKM-në për mjetet e përdorimit të forcës nga Policia e Shtetit.
Policia thotë gjithashtu se përdor armatim dhe pajisje speciale “të certifikuara sipas standardit NATO/BE”
Cili standard konkret? Çfarë niveli mbrojtjeje? Çfarë kategorie antiplumbi? Asnjë përgjigje.
Për tenderët, institucioni thotë se janë zhvilluar “disa procedura prokurimi” në vitet 2021, 2024 dhe 2025.
Sa tenderë? Me çfarë vlere? Kush i fitoi? Çfarë u ble? Me çfarë specifikimesh? Asgjë.
Për afatin teknik, Policia thotë se jelekët antiplumb kanë përdorim deri në 10 vjet, në varësi të llojit dhe specifikimeve teknike.
Po specifikimet ku janë? Lloji ku është? Data e blerjes ku është?
Në fund, Policia deklaron se jelekët aktualisht në përdorim janë brenda afatit teknik dhe brenda standardeve të kërkuara.
Por duket se standardi i ri i Policisë së Shtetit është të kthesh përgjigje për të mos dhënë informacion.
Redaksia i është drejtuar edhe më parë Policisë së Shtetit me kërkesa të ngjashme për informacion, por kjo është hera e parë që merr një përgjigje kaq tallëse, kaq bosh dhe kaq shpërfillëse.
Dhe kjo ndodh nën drejtimin e Skënder Hitës.
Largimi i Ilir Prodës dhe bashkë me të edhe “Kumbarit” të tij nga jeta publike dha një fije shprese se gjërat mund të shkonin për mirë në këtë institucion. Por, siç ka thënë dikur edhe kryeministri, “sistemi të prish”.
Këtu tallja ka arritur kulmin. Në gjuhën e memeve që janë sot në qarkullim, kjo është një tallje me “Bet 500”.
Dhe meqë jemi te lojërat e fatit, ato kanë pushtuar çdo cep të Tiranës, por shefat e Policisë mesa duket nuk shohin nga ajo anë. Kjo, megjithatë, është temë për një raportim tjetër.
Ligji për të drejtën e informimit parashikon edhe një hallkë tjetër në raste të tilla: Ankimimin te Komisioneri për të Drejtën e Informimit.
Por, siç ka treguar eksperienca e muajve të fundit, edhe ky institucion duket se ka dalë nga funksioni i tij dhe nuk merret më me çështje “kaq të vogla”./skyweb.al
