Prokuroria pranë Gjykatës së Shkallës së Parë të Juridiksionit të Përgjithshëm Korçë ka përfunduar hetimet dhe ka dërguar për gjykim disa shtetas të akuzuar për ngjarjen e rëndë të ndodhur më 14 gusht 2025, ku humbi jetën i mituri Erald Xhejo,14 vjeç.
Ngjarja ndodhi në ambientet e jashtme të lokalit “Amar” në fshatin Pirg, ku viktima u konfliktua fizikisht me një tjetër të mitur, shtetasin Enedio Guri.
Pamjet filmike të kamerave të sigurisë treguan qartë momentin kur autori Enedio Guri e godet viktimën me thikë, duke i shkaktuar plagën fatale.
Sipas hetimeve, viktima u transportua në gjendje të rëndë në Spitalin Rajonal të Korçës, por nuk mundi të mbijetonte për shkak të plagëve të marra me thikë në kraharor.
Hetimet zbuluan gjithashtu se babai i autorit, shtetasi Edison Guri nuk ka bashkëpunuar me organet e drejtësisë, por ka ndërmarrë veprime për të penguar zbulimin e së vërtetës.
Ai, së bashku me Roland Gurin dhe Flori Çelën ka tentuar të devijojë hetimet duke manipuluar prova dhe duke fshehur thikën e krimit, e cila u pastrua nga Roland Guri,
Në përfundim, Prokuroria ka kërkuar dërgimin në gjyq të:
- Enedio Guri (i mitur) për veprën penale “Vrasje në rrethana cilësuese” dhe “Drejtim i automjetit në mënyrë të parregullt”;
- Edison Guri (babai) për “Veprime që pengojnë zbulimin e së vërtetës”;
- Roland Gurin për “Veprime që pengojnë zbulimin e së vërtetës”, “Moskallëzim i krimit” dhe “Përkrahja e autorit në krim”;
- Flori Çela për “Moskallëzim i krimit” dhe “Përkrahja e autorit në krim”.
Si ndodhi ngjarja e rëndë
Grindja mes dy adoleshentëve u raportua të ketë nisur për arsye banale të llojit “përse më shikon”. Një ditë përpara ngjarjes së rëndë, autori Enedio Guri, banues në fshatin Leminot, ka shkuar përpara lokalit të xhaxhait të viktimës me një automjet duke xhiruar dhe gomat e më pas është larguar.
Ditën e ngjarjes Erald Xhejo i shoqëruar nga një shok i tij, kishte shkruar për tu qethur në berberhane, e ndodhur në afërsi të lokalit ku dhe u regjistrua tragjedia.
Në këto momente pranë tyre ka kaluar Enedio Guri me makinë. Ky i fundit ka fishkëllyer për Xhejon me qëllim për të ndaluar dhe për tu sqaruar.
Në momentin që autori ka ndaluar dhe ka zbritur nga automjeti, ka nisur një sherr verbal e më pas konfrontim fizik me 14-vjeçarin e më pas ka nxjerrë dhe thikën.
Në këto kushte 14-vjeçari ka marrë një karrige nga lokali dhe e ka vendosur përpara vetes për tu mbrojtur. Duke bërë hapa pas për t’iu larguar Enedio Gurit, i cili në dorë mbante një thikë, ai është penguar dhe në atë moment autori e ka goditur me thikë në zemër.
