Në vitin 2018, Ylli Osmënaj nga Fieri, tregon për emisionin “Stop” se u përfshi në një aksident rrugor, ku gjatë drejtimit të automjetit të tij, përplasi një të moshuar.
Pas hetimeve dhe procesit gjyqësor, ai u dënua me 4 vite shërbim prove, vendim që mori formë të prerë në vitin 2021.
Në të njëjtin vendim gjykate, ishte përcaktuar edhe kthimi i automjetit dhe dokumenteve përkatëse pas shlyerjes së dënimit. Megjithatë, edhe pse Osmënaj e ka përmbushur plotësisht detyrimin ligjor, mjeti nuk i është kthyer ende.
Qytetari përmes avokatit të tij i është drejtuar Prokurorisë Fier me një kërkesë zyrtare për kthimin e automjetit, por nuk ka marrë asnjë përgjigje.
“Në 12 dhjetor të vitit 2018 jam përfshirë në një aksident, duke shkuar për në komisariatin e Ballshit. Kalova në një shërbim prove për katër vjet, dënimin e kam mbyllur më 22 shkurt të këtij viti. Dua që të më kthejnë mjetin dhe sendet që më përkasin mua dhe që ka vendosur ligji. Automjeti që prej vitit 2018 ndodhet në komisariatin e Ballshit. Kam bërë kërkesë te Prokuroria e Fierit dhe përgjigjja më ka ardhur gjithmonë verbale ‘do e shohim’. Nuk kam marrë asnjë përgjigje. Ju lutem pse nuk më ktheni mjetet, pasi unë kam kryer të gjitha dënimet, të gjitha veprimet, nuk kam asnjë borxh”, thotë denoncuesi.
Pas tij edhe gazetari i “Stop” i dërgoi një shkresë zyrtare Prokurorisë, për të mësuar arsyet e vonesës dhe për të kërkuar zbatimin e vendimit gjyqësor. Në mënyrë të menjëhershme Ylli Osmënaj, u thirr dhe iu dorëzua makina që kërkonte prej vitesh./ Emisioni STOP
