Drejtori i Përgjithshëm i Burgjeve, Klevis Qose, ka njoftuar se 4,595 punonjës të sistemit të burgjeve do të marrin polica sigurimi.
Në një reagim në rrjete sociale, Qose bën me dije se sigurimi do të jetë për një periudhë trevjeçare dhe sipas tij synon të ofrojë mbrojtje shëndetësore dhe financiare për punonjësit dhe familjet e tyre.
“Në prag të festave të fundvitit, Drejtoria e Përgjithshme e Burgjeve shpreh mirënjohjen dhe vlerësimin e saj për përkushtimin, profesionalizmin dhe sakrificën e përditshme të të gjithë punonjësve të Sistemit Penitenciar.
Me këtë rast, Qeveria Shqiptare ka arritur të bëjë të mundur të garantojë policë sigurimi për 4595 punonjës të sistemit të burgjeve për tre vite. Një mbështetje që garanton mbrojtje shëndetësore dhe financiare për punonjësit dhe familjet e tyre.
Ky sigurim përfaqëson jo vetëm një dhuratë fundviti, por edhe një angazhim të vazhdueshëm për mirëqenien, sigurinë dhe dinjitetin e atyre që shërbejnë çdo ditë në një nga sistemet më sfiduese të vendit”,- thuhet në reagim.
