Kreu i PD-së, Sali Berisha tha se procesi i riorganizimit të partisë që ai drejton është në vijim. Në një konferencë për shtyp, i pyetur nëse Gazment Bardhi do të vijojë apo jo të qëndrojë në krye të grupit parlamentar të PD-së, Berisha nuk dha një përgjigje të qartë, duke thënë se vendimet i merr grupi. Megjithatë ai vlerësoi punën e bërë nga bardhi si kryetar grupi.
“Do i përcaktojë grupi të gjitha. Unë nuk po prononcohem, por unë kam vlerësim qartësisht për detyrën që Gazment Bardhi ka kryer si kryetar grupi. Por një gjë, funksionet ne i përcaktojmë në mënyrë demokratike. Ka rregulla aty dhe do zbatohen ato rregulla. Por Gazment Bardhi, meqë po më pyet mua, gjykoj se e ka kryer me dinjitet dhe e përmbush me dinjitet atë detyrë. Do jetë grupi që përcakton se kush do jetë kryetari i grupit”, tha Berisha.
I pyetur nëse do të hapë seancën e parë parlamentare në shtator, si deputeti më i vjetër në sallë, Berisha tha se nuk do ta bëjë diçka të tillë sepse, sipas tij, parlamenti është jo legjitim.
“Një parlament jo legjitim, nuk mund ta hap kurrë, kurrë. Nuk mund ti bëj vendit tim unë një antishërbim të tillë. Harroje. Po të ishte legjitim, me kënaqësi do ta bëja, do ta kisha patur kënaqësi, por ky është një parlament jo legjitim. Nuk përfaqëson vullnetin e qytetarëve shqiptarë, sipas të gjitha dokumenteve kombëtare dhe ndërkombëtare. Është rekomandim i Këshillit të Europës që thotë; në Shqipëri duhet të ndahet partia nga shteti. Kaq mjafton kjo frazë për të treguar se ky është parlamenti i partisë-shtet. E si mund ta hap unë atë? Si mund të ja lejoj vetes të ulem unë aty? Kurrë!”u shpreh ai.
Berisha ka deklaruar se nuk i njeh zgjedhjet e përgjithshme të mbajtura 11 maj, duke i konsideruar si “farsë elektorale”. Ai akuzon maxhorancën socialiste se ka manipuluar votën e qytetarëve.
