Policia e Tiranës ka reaguar në lidhje me pamjet që qarkulluan ditën e djeshme në rrjet, ku një i mitur, i cili pretendonte se ishte i afërm i Mario Përlleshajt, autorit të vrasjes së 14-vjeçarit Martin Cani, lëshonte thirrje kërcënuese gjatë një video live në rrjetin social “TikTok”.
Burime për mediat bëjnë me dije se atij i është mbyllur profili në “TikTok”, teksa përmes një komunikate zyrtare, blutë e kryeqytetit bëjnë me dije se e kanë vënë nën hetim 16-vjeçarin që shfaqet në video dhe që jeton në SHBA:
Të miturit që shfaqeshin në atë video jo vetëm që nuk e dënonin krimin e rëndë, por shoku i tyre e cilësoi “gjuajtës” 14-vjeçarin që vrau shokun e klasës dhe thotë se ai duhet ta kishte goditur edhe në kokë, përveç se në zemër. Ata madje flisnin edhe për një grup në Snapchat, mjaft i përdorur nga të miturit, ku shajnë të tjerët.
Njoftimi i Policisë së Tiranës:
Në lidhje me një video të publikuar në një portal, ditën e djeshme, ju informojmë se:
14-vjeçari u vra në derën e shkollës, Rama ia hedh fajin rrjeteve sociale: Po mendojmë t’i mbyllim TikTok dhe Snapchat
Specialistët e Sektorit për Hetimin e Krimeve Kibernetike të DVP Tiranë, menjëherë pas publikimit të pamjeve filmike, kanë identifikuar shtetasin 16 vjeç që shfaqet në video, i cili banon në SHBA.
Në vijim të veprimeve për rastin, janë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për fillimin e procedimit penal, për 16-vjeçarin.
Ky shtetas, nëpërmjet rrjeteve sociale, ka bërë thirrje për nxitje të urrejtjes ose grindjeve, për mbajtje të armëve të ftohta nga fëmijët dhe për përdorimin e tyre në konflikte.
Materialet procedurale i kaluan Prokurorisë, për veprën penale “Nxitja e urrejtjes ose grindjeve”, parashikuar nga neni 265 i Kodit Penal.
