Një 40-vjeçar ka mbetur i vrarë mbrëmjen e së mërkurës në qytetin e Laçit, pasi është qëlluar me armë zjarri pranë banesës së tij.
Viktima është identifikuar si Ilir Gjini, i njohur edhe me 3 emra të tjerë. Ngjarja ka ndodhur rreth orës 22:10 në zonën e Kurbinit.
Gjini është transportuar me urgjencë drejt Spitalit të Traumës në Tiranë, por nuk ka mundur t’u mbijetojë plagëve dhe ka ndërruar jetë gjatë rrugës.
“Rreth orës 22:10, në qytetin e Kurbinit, është qëlluar me armë zjarri ndaj shtetasit I.Gj alias I. L., alias I.K, alias I. N, rreth 40 vjeç. Ai është transportuar me urgjencë drejt Spitalit të Traumës, por ka humbur jetën gjatë transportimit.
Shërbimet e Policisë, menjëherë pas marrjes së njoftimit, kanë shkuar në vendngjarje dhe vijojnë kontrollet intensive në zonë për lokalizimin dhe kapjen e autorit/autorëve.
Ndërkohë, është ngritur grupi i posaçëm hetimor, i cili, nën drejtimin e Prokurorisë, po punon intensivisht për fiksimin e çdo prove që do t’i shërbejë hetimit, me qëllim zbardhjen dhe dokumentimin ligjor të ngjarjes, si dhe identifikimin dhe kapjen e autorit/autorëve”, njofton policia.
