Dy drejtues të lartë të Policisë Gjyqësore Federale belge kanë deklaruar se rrjetet kriminale shqiptare përbëjnë aktualisht sfidën kryesore për autoritetet e vendit.
Në një intervistë për gazetën belge De Morgen, drejtori i Policisë Gjyqësore në Anversë, Yve Driesen, u shpreh se “mafia shqipfolëse është sfida më e madhe” me të cilën përballet sot Belgjika. Deklaratat vijnë pesë vite pas operacionit të madh kundër platformës së koduar SKY ECC, që çoi në mijëra arrestime dhe sekuestrime të konsiderueshme droge e pasurish kriminale.
Sipas Driesen, ndërhyrja e vitit 2021 krijoi “vrima të mëdha” në krimin e organizuar, por ato janë mbushur shpejt, kryesisht nga rrjete shqiptare, si dhe grupe nga Serbia dhe Mali i Zi.
“Ata kontrollojnë të gjithë zinxhirin logjistik, nga Amerika e Jugut deri në port dhe rrjetet e shitjes në rrugë”, tha ai, duke theksuar nivelin e organizimit dhe strukturimit të këtyre grupeve.
Edhe drejtori i Policisë Gjyqësore në Bruksel, Eric Jacobs, u shpreh se grupet shqiptare operojnë në mënyrë shumë profesionale dhe janë më të vështira për t’u goditur. Sipas tij, ata nuk mbështeten domosdoshmërisht në korrupsion politik, por në kontrollin e zinxhirit të transportit dhe shpërndarjes.
