Presidenti i Serbisë, Aleksandar Vuçiç, ka deklaruar se fjalimi i tij vjetor i mbajtur së fundmi mund të jetë i fundit në postin e kreut të shtetit, duke lënë të hapur mundësinë e zgjedhjeve të parakohshme në vitin 2026.
Gjatë konferencës vjetore, Vuçiç tha se është shumë e mundur që ky të ketë qenë fjalimi i tij i fundit në cilësinë e presidentit të Republikës së Serbisë.
“Ky është ndoshta fjalimi im i parafundit, ose ndoshta i fundit si president. Është shumë e mundur që të jetë i fundit”, u shpreh ai.
Deklarata e tij vjen në një kohë tensionesh politike në vend, pas protestave të vazhdueshme të studentëve dhe opozitës, të cilat kanë kërkuar shpalljen e zgjedhjeve të parakohshme parlamentare. Vuçiç konfirmoi se kjo kërkesë është pranuar dhe se zgjedhjet do të mbahen gjatë vitit 2026.
Ai akuzoi opozitën dhe organizatorët e protestave se kanë tentuar të krijojnë destabilizim në vend, duke e krahasuar situatën me skenarin e “Maidanit” në Ukrainë.
“Sipas tij, qëllimi ishte të krijohej kaos, të bllokoheshin rrugët dhe institucionet, madje të nxitej dhuna. Ata donin një ‘Maidan’, por nuk ia dolën sepse pati rezistencë nga qytetarët”, tha Vuçiç.
Presidenti serb shtoi se zgjedhjet do të zhvillohen, por theksoi se opozita nuk do të dalë fituese.
“Do të shkojmë në zgjedhje dhe do t’i mposhtim kundërshtarët tanë politikë, të cilët nuk kanë as program dhe as ide. Zgjedhjet nuk fitohen me gënjeshtra, por me punë dhe me mbështetjen e qytetarëve”, u shpreh ai.
