Një ngjarje tronditëse ka ndodhur paraditen e së enjtes në qytetin e Shkodrës, ku një turist amerikan ka vrarë bashkëshorten e tij me thikë dhe më pas ka tentuar të vetëvritet.
Policia lokale ka bërë me dije se në pranga ka rënë shtetasi amerikan Brandon Saporito, 57 vjeç, i cili akuzohet për vrasjen e bashkëshortes së tij, Sandra Holley (Saporito), 53 vjeçe. Krimi ndodhi në një banesë të marrë me qira në lagjen “Vasil Shanto”, rreth orës 10:15 të paradites së 2 majit.
Sipas informacionit zyrtar, autori ka ushtruar dhunë ndaj bashkëshortes, duke e goditur fillimisht me sende të forta dhe më pas me mjet prerës (thikë), duke i shkaktuar vdekjen e menjëhershme në vendngjarje. Pas krimit, Saporito ka tentuar të vetëvritet duke prerë damarët, por është shpëtuar dhe ndodhet nën kujdes mjekësor dhe masë sigurie policore.
