Prokuroria e Posaçme kundër Korrupsionit dhe Krimit të Organizuar (SPAK) ka mbyllur hetimet dhe ka dërguar për gjykim në GJKKO dosjen në ngarkim të 6 personave, të cilët akuzohen si pjesë e një grupi kriminal. Ky grup dyshohet për vepra të rënda, përfshirë atentatin e dështuar ndaj Durim Bami dhe Ervin Kodrës pesë vite më parë, si dhe vrasjet e Hamza Terziut dhe Shkëlzen Kastratit.
Ndër të akuzuarit është edhe Armando Ndreca, vëllai i deputetit të Partisë Socialiste, Eduart Ndreca. Ai akuzohet për një stan me drogë dhe trafikim të 243 kg kanabis në Lezhë. I akuzuar është gjithashtu edhe kushëriri i tij, Elvis Ndreca, i cili doli në përgjimet e SKY ECC si i përfshirë në atentatin ndaj Bamit.
Të pandehurit në këtë dosje janë: Albert Zaja, Edison Muçeku (i ekstraduar nga Anglia), Armando Ndreca dhe Elvis Ndreca, Deivis Bajramaj dhe Adrian Pikli (i ekstraduar nga Gjermania).
Gjashtë personat akuzohen për:
- Tentativën e vrasjes së Durim Bamit dhe Ervin Kodrës më 4 nëntor 2020.
- Përgatitjen e vrasjes së Hamza Terziut në maj-korrik 2020, ku janë përfshirë Albert Zaja dhe Edison Muçeku.
- Sigurimin e mjeteve për vrasjen e Durim Bamit në korrik-gusht 2020, për të cilën akuzohet Elvis Ndreca.
- Organizimin dhe financimin e një grupi për prodhimin dhe shitjen e 243 kg kanabis në Lezhë në tetor 2020, për të cilën akuzohet Armando Ndreca.
- Tregtinë e paligjshme të armëve dhe municioneve në vitet 2020-2021, ku janë përfshirë Deivis Bajramaj dhe Adrian Pikli.
SPAK gjithashtu ka njoftuar pushimin e çështjes ndaj dy personave të tjerë, Silvio Cara dhe Elmir Tufa. Këta dy ishin marrë si të pandehur për ekzekutimin gabimisht të Shkëlzen Kastratit, më 1 shkurt 2021, në vend të objektivit të vërtetë, Kelmend Kastratit. Pas hetimeve të thelluara dhe analizës së përgjimeve në SKY ECC, nuk u provua se ata ishin autorë të përfshirë në krim. Për këtë krim, ka akuzë dhe dënim ndaj Albert Zajës, i cili është pjesë e dosjes së mësipërme.
