Në Prokurorinë Themelore të Prishtinës, Naim Murseli, i dyshuari për vrasjen e Liridona Ademajt, sot dha një version tjetër të ngjarjes.
Ka qenë vetë avokatja e Murselit, Teuta Zhinipotoku e cila ka theksuar që dëshmia e tij nuk është e njëjtë me atë të mëparshmen.
“Sot para Prokurorisë Themelore- departamenti për Krime të Rënda, në cilësinë e të pandehurit është dëgjuar i pandehuri Naim Murseli, dyshimi i bazuar është i orientuar në drejtim të veprës penale ‘Vrasje e Rëndë’ në bashkëkryerje nga neni 173 par 1.3 dhe 1.4 lidhur me nenin 31 të KPRK-së, si dhe i pandehuri ka rrëfyer versionin e vet të mbrojtjes dhe mbrojtja e tij lidhur me ngjarjen është tërësisht ndryshe nga ajo që është publikuar në rrjetet e informimit dhe ato sociale. Në të ardhmen kanë mbetur të dëgjohen edhe dëshmitarët e tjerë dhe pas dëgjimit të tyre do t’ju informojmë lidhur me rrjedhën e procedurës dhe përmbajtjen e deponimeve të tyre”, tha avokatja.
Murselit dhe dy të dyshuarit e tjerë, Granit Plava dhe Kushtrim Kokalla, ndodhen në paraburgim për vrasjen e Liridona Ademajt.
Ndaj Naim Murselit, rëndon vepra penale vrasje e rëndë në bashkëpunim, ndaj Plavës vepra penale vrasje e rëndë dhe mbajtje në pronësi, kontroll ose posedim të paautorizuar të armëve, ndërsa ndaj Kokallës bashkëpunim në vrasje.
Liridona Ademaj u vra më 29 nëntor të viti të kaluar në Prishtinë, në një ngjarje që ishte inskenuar si grabitje, por më pas u zbulua se ishte plan i menduar deri në detaje për ekzekutimin e saj.
