Vetëm pak minuta reshje shiu kanë mjaftuar për të përmbytur disa nga rrugët kryesore të qytetit të Vlorës.
Ndër zonat më problematike janë rruga “Gjergj Araniti”, rruga “Kosova”, zona pranë universitetit të Vlorës dhe biblioteka “Shefqet Musaraj”. Deri tani, zona e “Albano dhe Rominës” nuk ka raportuar probleme.
Megjithëse intensiteti i reshjeve është ulur, parashikimet meteorologjike sugjerojnë që në orët e ardhshme mund të ketë përsëri reshje me intensitet të lartë, duke rritur rrezikun e përmbytjeve të tjera.
Kujtojmë se pak javë më parë, reshjet masive shkaktuan përmbytje të mëdha dhe dëme materiale në qytetin e Vorës, duke vënë në vështirësi të shumta qytetarët.
Vlora po përballet me një situatë të ngjashme që ka nxjerrë sërish në pah problematikën e infrastrukturës së ujërave të zeza dhe kullimit.
