Komuniteti Mysliman i Shqipërisë, në bashkëpunim me Qendrën Bamirëse dhe Humanitare “Mbreti Selman” dhe me koordinimin e Ambasadës së Mbretërisë së Arabisë Saudite në Tiranë, kanë nisur fushatën e përvitshme të bamirësisë për familjet në nevojë në të gjithë vendin.
Ceremonia e inaugurimit u zhvillua në ambientet e Kolegjit Universitar “Bedër”, ku u bë e ditur se shpërndarja e ndihmave ka nisur dhe do të vijojë përgjatë muajit të shenjtë të Ramazanit, duke mbështetur rreth 6500 familje me vështirësi ekonomike në mbarë Shqipërinë.
Në këtë aktivitet morën pjesë Kryetari i Komunitetit Mysliman të Shqipërisë, Bujar Spahiu, Ambasadori i Arabisë Saudite në Tiranë, Fajsal Gazi Hifdhi, përfaqësuesi i Qendrës Humanitare “Mbreti Selman”, Sulejman el-Rebdi, si dhe drejtues të tjerë të KMSH-së, imamë dhe familjarë përfitues.
Në fjalën e tij, kryetari Bujar Spahiu falënderoi Qendrën “Mbreti Selman” dhe Ambasadën Saudite për mbështetjen e vazhdueshme, duke theksuar se kjo nismë realizohet për të dhjetin vit radhazi dhe përfaqëson një ndihmë të rëndësishme për familjet në nevojë gjatë Ramazanit.
“Takimi ynë sot nuk është thjesht një aktivitet formal, por një mesazh human që shpreh thellësinë e lidhjeve vëllazërore mes popullit shqiptar dhe atij saudit, si dhe vlerat e mëshirës, solidaritetit dhe përkujdesjes ndaj njëri-tjetrit, veçanërisht në këtë muaj të bekuar”, u shpreh Spahiu.
Ndërkohë, ambasadori Fajsal Gazi Hifdhi theksoi marrëdhëniet e shkëlqyera mes dy vendeve dhe rolin e iniciativave humanitare në forcimin e tyre.
“Kjo iniciativë buron nga besimi i thellë i Mbretërisë së Arabisë Saudite në rëndësinë e solidaritetit human dhe në përpjekjet për të ndihmuar nevojtarët dhe të varfrit”, u shpreh ambasadori.
Fushata konsiston në shpërndarjen e pakove ushqimore prej rreth 45 kilogramësh secila, të cilat fillimisht u dorëzohen përfaqësuesve të 36 myftinive në të gjithë vendin. Më pas, këta të fundit do t’i shpërndajnë ndihmat tek familjet në nevojë përgjatë gjithë muajit të Ramazanit.
