Deputeti i Partisë Demokratike, Belind Këlliçi, ka reaguar me ironi ndaj paralajmërimit të kryeministrit Edi Rama për vendosjen e një takse të re mbi vilat në zonat bregdetare. Në reagimin e tij, ai e lidh këtë masë fiskale me hetimet e SPAK-ut ndaj zv/kryeministres Belinda Balluku.
Përmes një postimi në Facebook, Këlliçi pretendon se taksa e paralajmëruar nga kreu i qeverisë mund të jetë një formë hakmarrjeje ndaj Ballukut, të cilën e përshkruan si një prej bashkëpunëtoreve të tij më të afërta. Sipas deputetit demokrat, hetimet dhe çështja penale ndaj saj e kanë vendosur kryeministrin në një situatë të vështirë.
“Edi Rama duket se ka gjetur mënyrën për t’u hakmarrë ndaj Ballukut, pasi ka duruar pengmarrjen e saj të gjatë”, shkruan Këlliçi.
Më tej, deputeti i opozitës vijon ironinë, duke e cilësuar taksën e paralajmëruar për vilat në bregdet si një masë ndëshkuese që Rama, sipas tij, po e përdor në raport me bashkëpunëtoren e tij.
“Por kreu i organizatës nuk rri duarkryq. Ai ka menduar një plan shpagimi dhe këtë e theksoi sot në monologun e tij. Edi Rama tha se do të ketë një goxha taksë të madhe për vilat në bregdet. Kjo është masa që ai ka menduar si ndëshkim ndaj Ballukut”, shprehet deputeti demokrat.
Në reagimin e tij, Këlliçi përmend gjithashtu disa prona në zonat e Palasës dhe Dhërmiut, për të cilat pretendon se janë zbuluar gjatë hetimeve të SPAK-ut që lidhen me Belinda Ballukun. Sipas tij, bëhet fjalë për tri vila, dy prej tyre në Palasë dhe një në Dhërmi.
“Deri tani, për bashkëpunëtoren kryesore në vjedhje, SPAK ka zbuluar tri vila, dy binjake në Palasë dhe një në Dhërmi”, shkruan Këlliçi, duke ngritur edhe akuza të tjera lidhur me përdorimin e fondeve publike.
Deklaratat e deputetit të PD-së vijnë pas paralajmërimit të Ramës për masa të reja fiskale ndaj pronave luksoze në bregdet. Pretendimet e Këlliçit për lidhjen mes kësaj takse dhe hetimeve ndaj Ballukut janë pjesë e reagimit të tij politik.
