Gjyqtarja e Apelit të GJKKO-së, Ilirjana Olldashi, vendosi sot të ndryshojë masën e sigurisë ndaj Jamarbër Malltezit, dhëndrit të ish-kryeministrit Sali Berisha, nga “arrest me burg” në “arrest shtëpie”.
Ndërkohë që e njëjta gjyqtare ka lënë në fuqi dy masat e sigurisë ndaj ish-Kryeministrit Berisha, atë te “detyrimit të paraqitjes” dhe “ndalim të daljes jashtë vendit”.
Por burime nga GJKKO bëjnë të ditur se një nga arsyet kryesore që duket se ka detyruar gjyqtaren të ndryshojë masën e sigurisë është gjëndja shëndetësore e vajzës së Malltezit.
Nga burimet mësohet se vajza e tij është në gjendje të rënduar shëndetësore, çka duket se ka sjellë edhe ndryshimin e masës së sigurisë nga arrest me burg në arrest shtëpie.
Malltezi u arrestua rreth 1 muaj më parë teksa ndodhej në mjediset e jashtme të aeroportit “Nënë Tereza”, duke pritur bashkëshorten e tij, Argita Malltezi, që kthehej nga një udhëtim jashtë vendit. Malltezi u ndalua nga forcat operacionale në kushte të pashpjeguara, lidhur me mënyrën se si vepruan, ndërsa gjyqtarja e GJKKO Irena Gjoka, me kërkesë të prokurorëve të SPAK, Enkelejda Millonai dhe Arben Kraja, kishin kërkuar masën e sigurisë “arrest me burg”.
