Pas protestës masive të zhvilluar një ditë më parë nga studentët dhe të rinjtë në Tiranë, kryeministri Edi Rama ka përsëritur thirrjen për dialog përmes një postimi në rrjetet sociale.
Kreu i qeverisë ka publikuar sërish pamjet e shilteve të vendosura përpara Kryeministrisë, duke lënë të kuptohet se mbetet i hapur për zhvillimin e bisedimeve me protestuesit.
Ndryshe nga postimet e mëparshme, kur Rama shfaqej vetë në videot e publikuara para protestës, këtë herë ai ka zgjedhur të mos jetë personalisht i pranishëm në pamjet e shpërndara.
Mesazhi vjen pas protestës së studentëve dhe të rinjve, e cila u shoqërua me tensione dhe përplasje me forcat e policisë. Protestuesit vijojnë të këmbëngulin në kërkesën për dorëheqjen e kryeministrit Edi Rama dhe të qeverisë së tij.
