Agjencia e Mbikëqyrjes Policore (AMP) dhe Prokuroria kanë nisur hetimet për plagosjen e 28-vjeçarit Erjon Vishkulli, i cili u godit në sy me plumb gome nga efektivët e policisë gjatë protestës në Tiranë.
I riu ndodhet në spital, ku i është nënshtruar një ndërhyrjeje kirurgjikale për shkak të dëmtimit të pësuar.
Pas incidentit, Drejtori i Përgjithshëm i Policisë së Shtetit ka urdhëruar Drejtorinë e Standardeve Profesionale të nisë menjëherë verifikimet për zbardhjen e plotë dhe të paanshme të rrethanave të ngjarjes.
Ndërkohë, AMP dhe Prokuroria po vijojnë veprimet hetimore për dokumentimin ligjor të rastit dhe përcaktimin e përgjegjësive.
Në reagimin zyrtar, Policia e Shtetit ka shprehur keqardhjen për plagosjen e të riut, duke i uruar shërim të shpejtë. Gjithashtu, institucioni ka shprehur keqardhje për të gjithë qytetarët, gazetarët dhe punonjësit e policisë që kanë mbetur të lënduar gjatë protestave në kryeqytet.
