Një replikë mes deputetit të Lëvizjes Bashkë, Redi Muçi, dhe deputetes socialiste Zegjine Çaushi ka tërhequr vëmendjen gjatë seancës së Kuvendit.
Teksa po fliste nga foltorja, Muçi e ndërthuri fjalën e tij politike me një koment ironik drejtuar deputetes së PS-së, duke iu referuar ndryshimit të saj në pamje.
“Urime kolegë që iu shmangët vezëve, urime Zegjinesë për look-un e ri”, tha Muçi, në një moment që solli reagimin e menjëhershëm nga ana e Çaushit.
Nga vendi i saj, deputetja socialiste iu përgjigj: “Ulu mo ulu, se na hape barkun, psikopat!”.
Përplasja verbale erdhi në një seancë ku Muçi kishte nisur fjalën e tij duke kritikuar mazhorancën dhe duke iu referuar protestave të zhvilluara jashtë Kuvendit.
Ai tha se deputetët socialistë kishin pasur një plan për t’iu shmangur vezëve që, sipas tij, protestuesit kishin paralajmëruar se do të hidhnin drejt godinës së Kuvendit.
Në vijim, Muçi akuzoi qeverinë dhe mazhorancën për përgjegjësi politike, ndërsa deklaroi se protestat nuk do të zbeheshin dhe se, sipas tij, zgjidhja do të ishte dorëheqja e qeverisë.
Ndërkohë, kryetari i Kuvendit, Niko Peleshi, ndërhyri pas fjalorit të përdorur gjatë replikës, duke i tërhequr vëmendjen Muçit për “gjuhë të papërshtatshme dhe seksiste”.
