Në një ditë kur vëmendja është kthyer te Haga, ku pritet të shpallet vendimi për katër ish-krerët e UÇK-së, një moment i ndjerë nga familja e Jakup Krasniqit ka tërhequr vëmendjen në rrjetet sociale.
Është vajza e Krasniqit, Gresa, ajo që ka ndarë një video ku shfaqet vajza e saj e vogël duke puthur portretin e gjyshit të saj. Në video është vendosur edhe një mesazh i shkurtër, por domethënës:
“Unë s’jam e lirë, pa lirinë tënde, gjysh.”
Krahas pamjeve, Gresa i ka kushtuar të atit një dedikim emocional, duke shprehur mallin dhe krenarinë për të.
“Prej tokës e gjer në qiell, do të jetoj me krenari që në gjakun tim, në trupin tim të vogël, rrjedh gjaku yt ilir!”, shkruan ajo.
Në fund të mesazhit, ajo e mbyll dedikimin me fjalët: “Të pres me mall e dashuri!”.
Momenti familjar vjen në një prej ditëve më të rëndësishme të procesit gjyqësor në Hagë. Sot pritet të zhvillohet seanca ku do të shpallet vendimi për Hashim Thaçin, Kadri Veselin, Jakup Krasniqin dhe Rexhep Selimin, pas më shumë se pesë vitesh qëndrimi në paraburgim.
Seanca në Dhomat e Specializuara të Kosovës është parashikuar të nisë në orën 10:00, ndërsa në Kosovë dhe në mesin e shqiptarëve jashtë saj vëmendja është përqendruar te vendimi që pritet të bëhet publik sot.
