Mashtronte familjet e dëmtuara nga tërmeti i vitit 2019 duke u premtuar dëmshpërblime dhe banesa të reja në këmbim të parave, arrestohet 45-vjeçarja në Tiranë.
Policia e Tiranës, në bashkëpunim me Sektorin për Hetimin e Krimit Ekonomik dhe Financiar, ka arrestuar Ina Cakajn, e cila dyshohet se kishte ngritur një skemë mashtrimi ndaj rreth 30 personave në zonën e Fushë-Krujës.
Sipas hetimeve, 45-vjeçarja prezantohej si punonjëse e administratës shtetërore dhe u kërkonte qytetarëve shuma që varionin nga 1 mijë deri në 10 mijë euro.
Në këmbim, ajo u premtonte familjeve të prekura nga tërmeti i vitit 2019 se do t’u siguronte dëmshpërblime ose banesa të reja, duke përfituar në mënyrë të paligjshme shuma të konsiderueshme parash.
Deri në këtë fazë të hetimit, skema dyshohet se ka shkaktuar një dëm financiar prej rreth 60 milionë lekësh të vjetra.
Gjatë veprimeve hetimore, Policia ka sekuestruar edhe dokumente dhe certifikata familjare në emër të personave të dëmtuar, të cilat dyshohet se janë përdorur nga 45-vjeçarja në funksion të skemës së mashtrimit.
Ina Cakaj është vënë nën akuzë për veprat penale “Mashtrimi”, “Falsifikimi i dokumenteve” dhe “Përvetësimi i titullit apo detyrës shtetërore”.
Ndërkohë, hetimet vijojnë për të identifikuar persona të tjerë që mund të jenë mashtruar dhe për të dokumentuar raste të tjera ku dyshohet përfshirja e 45-vjeçares.
