Polonia ka shpallur dy ditë zie kombëtare pas sulmit masiv me armë zjarri në Krakovë, ku bilanci i viktimave është rritur në gjashtë persona. Motivi i sulmit mbetet ende i paqartë, por ministri i Brendshëm polak, Marcin Kierwiński deklaroi se i dyshuari ishte i magjepsur nga ideologjitë e ekstremit të djathtë dhe kishte pikëpamje shumë radikale.
Zhvillime të tjera tronditëse u zbuluan pas sulmit, pasi policia gjeti të pajetë në banesën e tyre prindërit dhe motrën e të dyshuarit. Trupat e tre familjarëve u zbuluan në qytetin Ostrowiec Swietokrzyski, rreth 200 kilometra larg Krakovës. Autoritetet po hetojnë nëse ka një lidhje mes vrasjeve dhe sulmit masiv.
Ndërkohë, sheshi kryesor i Krakovës dhe rrugët përreth vijojnë të jenë të mbyllura, ndërsa qytetarët kanë vendosur qirinj në shenjë zie për viktimat. Flamujt në institucionet publike janë ulur në gjysmë shtizë, ndërsa për herë të parë që prej vitit 1939 është pezulluar për 12 orë edhe tradita e rënies së borisë nga kulla e kishës së Shën Marisë.
Ngjarja e rëndë ndodhi pasditen e së shtunës, në sheshin historik të Krakovës, një nga zonat më të frekuentuara nga turistët. Përveç 6 viktimave, 17 persona të tjerë mbetën të plagosur, mes tyre dy efektivë policie dhe vetë autori i dyshuar, 24 vjeç, i cili ndodhet në spital në gjendje kritike.
