Hetimet e SPAK për aktivitetin e paligjshëm të basteve dhe lojërave të fatit po thellohen dhe po shtrihen përtej skemave të njohura deri më tani. Sipas PUBLIK.AL, prokurorët e posaçëm kanë zhvilluar për një periudhë të gjatë hetime të detajuara, duke analizuar pista që lidhen jo vetëm me platformat online të paligjshme, por edhe me pengesat institucionale në procesin e licencimit.
Gazetari Sokol Bregu deklaroi se SPAK ka evidentuar ekzistencën e një figure kyçe, më pak të ekspozuar publikisht, por me ndikim në funksionimin e skemës së basteve. “Bëhet fjalë për një emër që nuk është shumë i njohur për publikun e gjerë, por që ka peshë në këtë histori,” u shpreh ai.
Sipas Bregut, hetimet për bllokimin e licencave të lojërave të fatit çojnë drejt një emri konkret, të lidhur me zonën e Durrësit: Gjergji Taho. Ky i fundit, sipas burimeve që po heton SPAK, mban një funksion drejtues dhe ka kompetencë direkte në procesin e dhënies së licencave, ndërkohë që dyshohet se ka penguar qëllimisht hapjen e tyre.
Gazetari theksoi se motivi i dyshuar i këtij bllokimi lidhet me përfitime personale, megjithatë çështja ndodhet ende në fazën e hetimit.
“Duhet ta sqarojmë për publikun: jemi në fazën e dyshimeve të SPAK. Prezumohet pafajësia dhe asgjë nuk është ende e provuar. Verdiktin përfundimtar e jep gjykata, mbi bazën e fakteve”, nënvizoi Bregu.
Sipas PUBLIK.AL, hetimi aktual përfshin analizimin e faqeve online të basteve, verifikimin e lidhjeve të mundshme me krimin e organizuar, si dhe dyshimet se persona nga brenda institucioneve shtetërore mund të kenë penguar licencimin e ligjshëm për të mbajtur aktiv tregun e paligjshëm të lojërave të fatit.
Këto zhvillime tregojnë se SPAK po ndjek një linjë hetimore të zgjeruar, e cila synon të zbardhë jo vetëm aktivitetin kriminal të basteve online, por edhe mekanizmat institucionalë që dyshohet se e kanë toleruar ose favorizuar këtë aktivitet për vite me radhë.
