Xhuliano Skuka është drejt largimit nga Maribori. Ky është lajmi i raportuar nga mediat sllovene. Klubi do të bëjë spastrime në këtë dritare transferimesh dhe në listën e gjatë bën pjesë edhe ish-sulmuesi i Partizanit.
Dibrani është ende në pronësi të klubit të Metzit në Francë dhe pas fundit të kësaj aventure ai do të kthehet në klubin që pagoi 1.4 milionë euro në janarin e shkuar për ta blerë nga Partizani. Megjithatë, me siguri Skuka nuk do të qëndrojë te Metzi në pjesën e mbetur të sezonit dhe do të shohë për të tjera mundësi që tregu do t’i ofrojë. Formula e transferimit të radhës pritet të jetë sërish huazimi.
Një nga opsionet e Skukës është edhe Partizani. Të kuqtë e kanë gjithnjë të hapur derën për dibranin dhe do të ishin të gatshëm ta huazonin duke paguar një pjesë të rrogës. Gjithsesi, për momentin kjo është vetëm në kuadrin e dëshirës, pasi me siguri sulmuesi do të presë deri në javët e fundit të merkatos për të caktuar stacionin e tij të radhës. Skuka shënoi vetëm 2 gola me Mariborin. Një opsion për sulmin e kuq është përfolur edhe Dejvi Bregu, i cili gjithsesi mbetet një alternativë më e zbehtë.
PLANI I MERKATOS – Sa i përket merkatos në dalje, të kuqtë kanë marrë disa oferta për lojtarët që kanë spikatur më së shumti. Në qendër të merkatos është Arinaldo Rrapaj, për të cilin të kuqtë kërkojnë një shifër prej rreth 600-700 mijë eurosh. Por deri më tani, për vlonjatin dhe për pjesën tjetër të skuadrës nuk ka mbërritur asnjë ofertë, që bind Demin të heqë dorë nga ndonjëri prej senatorëve të ekipit.
Sa u përket afrimeve, për momentin nuk është negociuar me asnjë emër konkret, por klubi është ende në studimin e tregut dhe në hartimin e listës së alternativave. Me ardhjen e Shehit, në ditët në vijim pritet që gjërat të bëhen me konkrete. Përveç një sulmuesi “gjakftohtë”, mbrojtja do të ketë vëmendjen më të madhe, teksa pritet të shihet edhe për një mesfushor “shkatërrues”, rol, të cilin aktualisht nuk e bën askush. Trajneri Shehi e ka të nevojshëm një lojtar të tillë për skemat e tij, pasi te Tirana kemi parë ta ketë gjithnjë. Në sezonin e parë ishte Ardit Toli, ndërsa më pas u transferua Albano Aleksi. Largimi i Matondos në verë ka lënë një “gropë”, që nuk është zënë ende në ekipin e kuq.
