Një mesazh i shpërndarë në një grup komunikimi nga kryetari i Bashkisë së Librazhdit, Mariglen Disha, ka mbërritur në redaksine e Maska.al si denoncim dhe ngre pikëpyetje mbi organizimin e pjesëmarrësve në aktivitetet ku merr pjesë kryeministri Edi Rama.
Në mesazhin e siguruar, drejtuesve lokal u kërkohet të verifikojnë pjesëmarrjen e njerëzve, të vendosin persona në hyrje për orientimin e tyre dhe të kujdesen që pjesëmarrësit të mos largohen gjatë zhvillimit të aktivitetit.
“…mos çohen e na ikin në mes të eventit”, thuhet ndër të tjera në mesazh.
Po ashtu, një pjesë e veçantë e udhëzimit kërkon që në çdo zonë të ketë persona “entuziastë”, të cilët do të duartrokasin dhe brohorasin gjatë fjalimit të Kryeministrit.
“Gjithashtu në secilën zonë të njësive sigurohuni që të keni ca ‘entuziastë’ – njerëz që do duartrokasin e brohorasin gjatë fjalimit të KM”, shkruhet në mesazh.
Denoncimi rikthen në vëmendje akuzat e përsëritura të opozitës dhe qytetarëve se aktivitetet politike të kryeministrit Rama shpesh mbushen me administratë publike dhe pjesëmarrës të mobilizuar nga strukturat shtetërore, akuza që janë mohuar vazhdimisht nga mazhoranca.
