Në heshtje të plotë dhe larg syrit të publikut, Komisioni Qendror i Zgjedhjeve, nën drejtimin e Ilirian Celibashit, ka shpallur një tender me vlerë 42,972,173 lekë pa TVSH, ose rreth 439 mijë euro, për “mirëmbajtjen e moduleve ekzistuese të sistemit informatik të KQZ-së”.
Por ajo që bie në sy nuk është vetëm fondi i lartë dhe afati 36-mujor i kontratës, por kompania fituese e paracaktuar përmes manipulimit me sistemin e pikëve – që rezulton e lidhur drejtpërdrejt me familjen e kryebashkiakes së Durrësit, Emiriana Sako.
Kompania e shpallur fituese: WOLF TECHNOLOGIES
Sipas të dhënave nga OpenCorporates.al:
- Emri i kompanisë: Wolf Technologies
- NIPT: M21622007Q
- Administrator: Anxhelo Sako
- Data e regjistrimit: 2021
- Objekti: zhvillim aplikacionesh softuerike dhe shërbime IT
Kompania është themeluar vetëm 2 vite më parë, me një histori minimale në treg, por tashmë përfiton një nga kontratat më strategjike të KQZ-së. Administrator i kompanisë është Anxhelo Sako, që sipas burimeve të Publik.al është i afërm i kryebashkiakes së Durrësit, Emiriana Sako, një emër i rëndësishëm në strukturën e Partisë Socialiste dhe e besuar e kryeministrit Rama në pushtetin vendor.
Si po trukohet tenderi nga Celibashi?
Zgjidhet sistemi i pikëve, jo oferta më e ulët, një skemë klasike për të përjashtuar konkurrencën reale.
- Kriteret teknike të tenderit janë përshkruar në mënyrë të tillë që vetëm një firmë me njohje paraprake të moduleve ekzistuese të KQZ-së mund të merrte pikët maksimale.
- Afati 36-mujor dhe ndarja në 4 vite buxhetore e bën kontratën afatgjatë dhe të sigurt financiarisht për përfituesin.
Favori familjar i radhës në administratën publike
Tenderi i KQZ-së, një institucion që duhet të garantojë besueshmëri dhe neutralitet, po rezulton një tjetër skemë klienteliste dhe korrupsioni i sofistikuar, ku paratë publike kalojnë në llogaritë e familjarëve të pushtetit.
Kjo praktikë e kalimit të kontratave strategjike në duart e njerëzve të lidhur me politikën është shndërruar në normë – veçse këtë herë është përfshirë drejtëpërdrejt një institucion zgjedhor, çka e bën rastin shumë më të rëndë politikisht dhe penal.
Skema e Celibashit 80 milionë lekë të vjetra për hosting-un e faqes së KQZ-së
Pasi ka shpenzuar qindra mijëra euro për tendera me pikëzim të dyshimtë, Kryekomisioneri Ilirjan Celibashi është gati të shpallë edhe një tjetër kontratë të madhe me elementë të qartë klientelizmi.
Burime pranë Komisionit Qendror të Zgjedhjeve thonë skemq Celibashi po e përdoret sërish, këtë herë për shërbimin e hostimit të faqes zyrtare të institucionit, me një vlerë të përllogaritur 8.119.870 lekë të reja, ose mbi 80 milionë lekë të vjetra.
Sipas të dhënave zyrtare, tenderi i ri është shpallur me REF-52248-06-24-2025 dhe është klasifikuar si “Marrëveshje Kuadër me një operator ekonomik”, një formulë që mundëson shtesa të mëvonshme fondesh dhe zgjatje kontrate pa garë të re.
Afati përfundimtar i dorëzimit të ofertave është 7 korrik 2025, ndërkohë që, sipas gojëve të liga brenda KQZ-së, fituesi është paracaktuar: kompania ONE Albania.
Një model që përsëritet: “gara” që vendoset paraprakisht
Njësoj ky proces po zhvillohet me:
- Pikëzim subjektiv, që skualifikon automatikisht operatorët më konkurrues financiarisht;
- Vlerë të fryrë, në raport me koston reale të shërbimit të hostimit në tregun privat;
- Kohëzgjatje të papërcaktuar qartë, që hap mundësinë e faturave të reja në të ardhmen;
- Transparencë minimale për kriteret e vlerësimit të ofertave.
Në dokumentet zyrtare nuk jepen argumente teknike që të justifikojnë pse KQZ ka vendosur të paguajë një shumë kaq të madhe për hostimin e një faqeje publike, e cila edhe në variantin më të avancuar nuk do të kërkonte investime të tilla.
Të dhënat e tenderit (burimi: sistemi i prokurimeve)
- Objekti: Shërbimin e hostimit të faqes zyrtare të KQZ-së
- Data e hapjes së tenderit: 25.06.2025
- Afati i fundit për ofertat: 07.07.2025, ora 11:00
- Vlera e përllogaritur: 8.119.870 lekë
- Kodi CPV: 72415000-2
- Tipi i kontratës: Shërbime
- Autoritet kontraktues: Komisioni Qendror i Zgjedhjeve
Një tjetër kontratë për të njëjtët klientë politikë?
Burime të mirëinformuara shprehen për Publik.al se ky tender është pjesë e të njëjtës filozofi: të mbajturit e kontrolleve financiare në pak duar, duke përdorur sistemin e pikëve për të justifikuar eliminimin e ofertave më të lira.
Në këtë rast, thuhet se Celibashi ka marrë garanci se kompania ONE Albania do të shpallet fituese, për shkak të lidhjeve që kjo kompani ka kultivuar ndër vite me pushtetin qendror dhe një pjesë të drejtuesve teknikë të KQZ-së.
Nëse ky informacion verifikohet, bëhet fjalë për një tjetër akt të rëndë të shpërdorimit të fondeve publike, për të cilin Prokuroria duhet të nisë hetim menjëherë.
Publik.al mbetet në terren për të ndjekur procesin deri në shpalljen e fituesit më 7 korrik 2025, duke evidentuar të gjitha anomalitë që mund të faktojnë një skemë të përgatitur që në nisje.
