Rasti i ish-drejtueses së SHISH, Vlora Hyseni, vjen në një moment delikat për qeverinë shqiptare, shkruan media italiane Linkiesta.it, duke e vendosur zhvillimin në kontekstin e hetimeve të SPAK ndaj zyrtarëve të lartë dhe procesit të integrimit të Shqipërisë në Bashkimin Evropian.
Sipas medias italiane, kryeministri Edi Rama ndodhej në Nju Jork për Asamblenë e Përgjithshme të Kombeve të Bashkuara kur nga Tirana mbërriti lajmi se Hyseni ishte vendosur në arrest shtëpie.
Linkiesta i referohet akuzave të ngritura nga SPAK ndaj Hysenit për “përkrahje të autorit të krimit” dhe “zbulim të të dhënave të klasifikuara”, si dhe pezullimit të saj nga detyra. Më pas, Hyseni u shkarkua nga drejtimi i SHISH, me urdhër të Ramës.
Media italiane thekson se përgjegjësitë në këtë çështje mbeten ende për t’u përcaktuar, duke sjellë në vëmendje edhe qëndrimin e Ramës për respektimin e parimit të prezumimit të pafajësisë. Rama ka deklaruar gjithashtu se askush nuk është mbi ligjin.
Linkiesta e lidh rastin Hyseni edhe me hetime të tjera të SPAK ndaj figurave të rëndësishme të qeverisë. Në veçanti përmendet ish-zëvendëskryeministrja dhe ish-ministrja e Infrastrukturës dhe Energjisë, Belinda Balluku, ndaj së cilës SPAK kishte nisur hetime lidhur me disa procedura prokurimi publik. Sipas medias italiane, hetimi është zgjeruar më tej edhe në pista të tjera.
