Një përplasje e ashpër ka shpërthyer në Komisionin e Prokurimit Publik gjatë javëve të fundit në lidhje me tenderëte e AKSHI-t. Më e fundit ka të bëjë me tenderin e shpallur nga Agjencia Kombëtare e Shoqërisë së Informacionit me fond limit rreth 2.6 milionë euro, për ndërtimin e platformës kombëtare ACRIS (Albanian Current Research Information System).
Siç meson Skyweb.al, kompania INTECH+, në pronësi të Sokol Sinanit, i njohur si ortak i ish-ministrit Ilir Beqaj dhe përfitues i madh i tenderëve të teknologjisë së informacionit, ka dorëzuar dje një ankesë në KPP, ku hedh akuza të forta për paracaktim të fituesit.
Në ankesë, Sinani ngre si problem kryesor mungesën e caktimit të kodit CPV, të cilin e cilëson kufizim të drejtpërdrejtë të konkurrencës:
“Mospërcaktimi bën të mundur që OE të kufizohen dhe të mos marrin pjesë në këtë procedurë duke lindur dyshimin e arsyeshëm të bazuar në këtë provë, se Autoriteti qëllimisht ka kufizuar konkurrencën artificialisht duke shkuar ndesh me parimet themelore të procedurave të prokurimeve publike. Gjithashtu AK ka cënuar OE duke fshehur informacion, duke mos qenë i qartë në atë çfarë kërkon, pasi mosparaqitja e këtij kodi, kufizon të drejtën për informim të OE, kufizon ata në të marrin pjesë në procedurat që i shohin të arsyeshme në kuadër të objektit të tyre të aktivitetit dhe më gjerë.”
Sinani kërkon heqjen e këtij kufizimi dhe ka vënë në dukje edhe një tjetër kusht të debatueshëm: detyrimin që punonjësit e kompanive pjesëmarrëse të kenë figuruar në listë-pagesa për të paktën tre muaj para dorëzimit të ofertës.
Sipas tij, ky kriter është i padrejtë dhe përdoret shpesh për të eliminuar konkurrencën reale.
Përplasjet në KPP për tenderët e AKSHI kanë shpërthyer hapur pas rikthimit të Gerond Meçes i Advanced Business Solution, pas dy vitesh “zbythjeje” të detyruar, shkaku i së cilës dyshohet se lidhet me disa përgjime.
Në anën tjetër, “furtuna” ka nisur në krahun e Ermal Beqirit, i cili tashmë është futur në radarin e SPAK.
Vetë Sinani, përveç INTECH+, është gjithashtu pronar i Dat Log, një tjetër kompani që ka marrë tenderë të rëndësishëm nga AKSHI, shpesh në partneritet me Meçcen.
Tenderi i AKSHI-t parashikon ndërtimin e një platforme kombëtare për menaxhimin elektronik të titujve akademikë, gradave shkencore, revistave dhe projekteve kërkimore të financuara. Kontrata është e ndarë në 166.6 milionë lekë për implementim dhe 83.3 milionë lekë për mirëmbajtje, me një afat 9-mujor për implementimin dhe 24-mujor për mirëmbajtjen. /skyweb.al
