Kushtet atmosferike janë përkeqësuar në Qarkun e Dibrës këtë të shtunë, ku ulja e temperaturave ka sjellë reshje breshëri në zonat me lartësi mbi 900 metra.
Breshëri ka përfshirë edhe zonën e Xibrit, pranë tunelit të Murrizit, duke krijuar një shtresë mbi asfaltin e Rrugës së Arbrit.
Për këtë arsye, drejtuesit e automjeteve që udhëtojnë drejt Dibrës apo Tiranës përmes këtij aksi rrugor këshillohen të tregojnë kujdes të shtuar, pasi breshëri në rrugë rrit rrezikun e aksidenteve.
Problematike vijon të jetë edhe situata me furnizimin me energji elektrike. Në disa zona të qarkut ende nuk është rikthyer energjia, ndërsa grupet e punës ndodhen në terren për riparimin e defekteve dhe normalizimin e furnizimit për abonentët.








