Protesta e studentëve është zhvilluar këtë të shtunë pranë Akademisë së Arteve në Tiranë, aty ku po mbahej Asambleja e Partisë Socialiste të kryeqytetit. Të rinjtë janë mbledhur për të përcjellë mesazhet e tyre kundër qeverisë, duke shfrytëzuar praninë e kryeministrit Edi Rama në aktivitetin politik.
Në momentin kur kreu i qeverisë ka dalë nga ambientet e Akademisë së Arteve, studentët kanë reaguar me thirrje kundër tij dhe qeverisë, duke brohoritur: “Poshtë diktatura! Qeveri e krimit!”
Protestuesit kanë zgjedhur ta bëjnë të dëgjuar zërin e tyre përmes një proteste, duke shprehur pakënaqësinë ndaj qeverisjes dhe duke kërkuar që shqetësimet e tyre të mos anashkalohen.
Ndërkohë, një ditë më parë, Rama kishte zhvilluar një takim me një grup studentësh, të cilët sipas tij kërkojnë të protestojnë në mënyrë paqësore dhe jo përmes akteve të dhunës apo hedhjes së gurëve.
Kryeministri publikoi edhe sot pamje nga ky takim, duke bërë të ditur se me studentët kishte rënë dakord që debati i zhvilluar mes tyre të mos bëhej ende publik, ndërsa të publikoheshin vetëm pamjet filmike.







