Kryetari i Bashkisë Mat, Altin Bojn, ka njoftuar përmes një postimi në rrjetet sociale zhvillimin e një takimi zyrtar me përfaqësues të Ambasadës së Shteteve të Bashkuara të Amerikës, ku është diskutuar një projekt bashkëpunimi me Shërbimin e Mbrojtjes nga Zjarri dhe Shpëtimit (MZSH).
Sipas Bojn, projekti parashikon ndërtimin e një stacioni të ri zjarrfikës, i cili do të plotësojë kushtet dhe standardet bashkëkohore, me synimin për të forcuar kapacitetet operacionale të MZSH-së dhe për të rritur nivelin e sigurisë për komunitetin e Matit.
“Ky investim do të mundësojë një reagim më të shpejtë dhe më efikas ndaj emergjencave, duke garantuar mbrojtje më të madhe për jetën dhe pronën e qytetarëve,” – shkruan kryebashkiaku në postimin e tij.
Ai thekson se bashkëpunimi me partnerët ndërkombëtarë mbetet kyç për përmirësimin e shërbimeve dhe rritjen e sigurisë publike në territorin e bashkisë Mat.
