Pas vizitës së Edi Ramës në Izrael, mediat kanë raportuar se disa kompani izraelite do ndërtojnë një qendër të dhënash (data center) në Shqipëri me vlerë 100 milionë euro.
Por revista më e madhe e kësaj fushe, Data Center Dynamics shkruan se nuk dihet gjë për kompanitë që do e ndërtojnë ndërsa mund të bëhet fjalë për një projekt fantazmë.
Nga Jason Ma, DATA CENTER DYNAMICS
Kompania e mbështetur nga Izraeli, Albania Data Center (ADC), do të zhvillojë një qendër të dhënash me kapacitet 32MW në një zonë të lirë ekonomike pranë Tiranës, kryeqytetit të Shqipërisë.
Sipas medias izraelite Globes, objekti prej 4.5 hektarësh do të kushtojë rreth 100 milionë euro (118 milionë dollarë), me mundësi zgjerimi deri në 100MW. Ai do të vendoset në TEDA, një zonë e lirë ekonomike, e krijuar së fundmi ë veri-perëndim të Tiranës.
Globes raporton se objekti do të përdoret nga kompania shqiptare teknologjike Infosoft, një kompani gjermane për ruajtjen e të dhënave që nuk ka emër, dhe një klient i paidentifikuar i qeverisë shqiptare.
ADC ka shfaqur interes për një qendër të dhënash në Shqipëri që nga marsi i vitit të kaluar, kur kompania publikoi një postim në LinkedIn për ceremoninë e nënshkrimit të qendrës së të dhënave.
Kompania gjithashtu ka pohuar se kjo do të jetë qendra e parë e këtij lloji në Shqipëri, por Data Center Map liston katër qendra ekzistuese të dhënash në vend, të gjitha gjithashtu të vendosura në ose rreth Tiranës.
Rreth ADC dihet pak, pasi kompania ka vetëm një faqe LinkedIn dhe nuk ka një website zyrtar. Përkundër emrit të saj, duket se kompania zotërohet nga dy kompani të lidhura me Izraelin ose të bazuara atje: Happy Technologies, për të cilën gjithashtu dihet pak, dhe DIT, një kompani konsulence IT.
Gjithashtu nuk është e qartë nëse ADC ka zhvilluar ose menaxhuar qendra të tjera të dhënash më parë.
