Gazeta zvicerane Tages-Anzeiger i ka kushtuar një artikull bumit të ndërtimeve dhe investimeve në pasuri të paluajtshme në Shqipëri, përfshirë edhe projektin e investimit në Zvërnec.
Në artikull ngrihen pikëpyetje mbi mënyrën se si merren vendimet për projekte të mëdha ndërtimi në vendin tonë, ndërsa kryeministri Edi Rama paraqitet si një figurë me ndikim të drejtpërdrejtë në zhvillimin urban dhe arkitekturor.
Gazeta i referohet edhe kritikëve të qeverisë, të cilët e akuzojnë Ramën si personi që ushtron kontroll të gjerë mbi vendimmarrjen dhe se në raste të caktuara projektet zhvillohen pa procese tradicionale tenderimi.
Një pjesë e rëndësishme e shkrimit i kushtohet edhe librit “The Albanian Files”, botim i shtëpisë zvicerane Lars Müller Publishers, i cili përmbledh qindra projekte arkitekturore të propozuara për Shqipërinë.
Tages-Anzeiger shkruan po ashtu se disa arkitektë kanë deklaruar se janë kontaktuar drejtpërdrejt nga Rama përmes rrjeteve sociale për të zhvilluar projekte në Shqipëri, ndërsa nuk lë pa përmend gjithashtu edhe qëndrimet e disa aktivistëve dhe gazetarëve të pavarur për mënyrën e financimit të disa projekteve dhe lidhjet e dyshuara me paratë e trafikut të drogës.
“Në fakt, Rama e drejton personalisht bumin e ndërtimit dhe të pasurive të paluajtshme në vend. Kryeministri është i diplomuar për pikturë dhe së fundmi ka ekspozuar edhe në Art Basel.
Se si e imagjinon ai të ardhmen arkitekturore të vendit të tij, tregohet në librin “The Albanian Files”. Në rreth 800 faqe prezantohen më shumë se 500 projekte ndërtimi, të hartuara nga 60 studio ndërkombëtare arkitekture në Shqipëri. Parathënien e librit e ka shkruar vetë Rama.
Disa arkitektë pranojnë hapur se janë kontaktuar drejtpërdrejt nga kryeministri përmes WhatsApp-it ose Instagramit, me kërkesën për të hartuar projekte për Shqipërinë- projekte që më pas, sipas pretendimeve, janë realizuar edhe me paratë e mafias së drogës.
Sipas aktivisteve dhe gazetarëve të pavarur, në raste të tilla nuk zhvillohen tenderë publikë. Sipas akuzave të tyre, Rama shpesh merr vendime dhe qeveris si një autokrat.
Një arkitekt nga Roterdami e lavdëron këtë liri të pakufishme dhe madje i uron Ramës të qeverisë për gjithë jetën.
“The Albanian Files” është botuar nga Lars Müller Publishers në Zyrih. Disa aktivistë në Tiranë e konsiderojnë tashmë librin si një lloj “aktakuze të shkruar kundër Edi Ramës”.
Rama i mohon akuzat dhe i cilëson ato si pjesë të një fushate kundër tij dhe Shqipërisë,” shkruan Gazeta zvicerane ndër të tjera.
