Kryeministri Edi Rama ka zhvilluar këtë të mërkurë një mbledhje me drejtuesit politikë të qarqeve, e cila ka zgjatur më shumë se një orë dhe ka nisur pak minuta me vonesë nga orari i planifikuar 08:30.
Në qendër të diskutimeve, Rama ka kërkuar nga drejtuesit politikë dhe ministrat që të jenë më afër qytetarëve dhe të adresojnë shqetësimet e tyre në terren. Megjithatë, vëmendje të veçantë ka marrë edhe reagimi i tij lidhur me protestën e ditëve të fundit.
Sipas Ramës, ajo që po ndodh mund të konsiderohet si një “luftë digjitale”, të cilën ai e ka cilësuar si të vështirë për t’u përballuar me mjetet tradicionale të komunikimit dhe politikës.
Pas përfundimit të mbledhjes, kryeministri është parë në një komunikim të shkurtër me kreun e Grupit Parlamentar të Partisë Socialiste, Taulant Balla, përpara se të largohej me makinë pa dhënë deklarata për mediat, duke i përshëndetur shkurt gazetarët.
Më pas, Rama pritet të zhvillojë një tjetër takim me kryebashkiakët, i cili do të mbahet në orën 09:30 në ambientet e ish-hotel “Dajti” në Tiranë.
