Kryeministri Edi Rama ka kritikuar dhe paralajmëruar disa kryetarë bashkish, duke u kërkuar që të mos lënë detyrat në terren për të ardhur në Tiranë, përfshirë edhe në aktivitete apo protesta.
I panikosur nga protesta, Rama pretendoi se ka marrë ankesa të përsëritura nga qytetarët, veçanërisht në juglindje të vendit dhe në aksin Tiranë–Korçë, për mungesën e disa drejtuesve vendorë në komunitetet e tyre.
Me ultimatum, por pa përmendur emra, Rama iu kërkoi të mos udhëtojnë më drejt Tiranës.
“Po e mbyll me një vërejtje për disa nga kryetarët e bashkive, nuk dua ti përmend me emra. Janë bërë pak problem për komunitetin, pasi nuk qëndrojnë në komunitet gjatë gjithë javës, por vijnë në Tiranë edhe në ditët kur duhet të jenë në krye të detyrës atje. Kjo praktike duhet të marrë fund. Nuk janë të gjithë, por janë disa.
Besoj që kam të gjithë mirëkuptimin tuaj për ta adresuar një orë e më parë këtë shqetësim, i cili është një shqetësim që më ka ardhur në mënyrë të përsëritur nga disa prej komuniteteve tuaja, kryesisht në juglindje të vendit, në aksin Tiranë-Korçë. Flas për të zgjedhurit e PS në aksin Tiranë-Korçë. Nuk e kam për Sotiraqin dhe as për ministrin. Për ta mbyllur me një buzëqeshje të ëmbël dhe mos kthehet në një buzëqeshje të hidhur për asnjërin”, deklaroi Rama.
