Pasi ka bërë punimet shkel e shko në rrugët e qytetit dhe nuk ka më si t’i shpjegojë shpërdorimet e fondeve, kryetari i Bashkisë Kamëz, Rakip Suli, iu kthehet rrugicave në periferi për t’u hedhur asfalt. Këtë herë Suli ka vendosur të shpenzojë 600 milionë lekë për t’i hedhur një shtresë asfalt një rruge që është vetëm 1.3 kilometra e gjatë.
Bëhet fjalë për tenderin që ka publikuar më datë 7 dhjetor 2023 me objekt “Rikonstruksion Rruga ‘Azem Hajdari’”. Në foton më poshtë tregohet që është një rrugicë e shkurtër lagjeje, por ka nevojë për rehabilitim.
Do të duhej të duartrokitej për investimin që bën, por kryebashkiaku çdo tender e sheh si mundësi përvetësimi duke ia kaluar fondin miqve të tij.
Përveç kësaj, shifra 600 milionë lekë është alarmuese për këtë rrugë të shkurtër është abuzim dhe ekzagjerim.
Në dokumentet që disponojmë rezulton se kontrata e firmosur është e kundërligjshme sepse ka shkelur konkurrencën, një nga kërkesat kryesore në ligjin mbi Prokurimet Publike.
Në fakt, në fillim të njoftimit të garës kanë paraqitur ofertat e tyre 10 kompani dhe propozimet e tyre kanë qenë pak a shumë në të njëjtin nivel.
Por kjo nuk do të thotë që të pranohet oferta më e shtrenjtë dhe t’i falet në tavolinë tenderi kompanisë që dëshiron kryetari. Kështu ka ndodhur, 10 prej firmave pjesëmarrëse janë skualifikuar në fazën e parë të procedurave. Në tavolinën e Sulit gjendej vetëm zarfi i firmës NDERTIMI shpk, në pronësi të Luan Balit. Nuk mund të quhet prokurim i rregullt me vetëm një ofertë, prandaj Suli duhej ta anulonte tenderin dhe të priste propozime më të përshtatshme
Dhe në këtë mënyrë Bali përfitoi kontratën pa u lodhur fare.
Ndërkohë Open Data e ka vlerësuar procedurën me “Flamurin e kuq”, për treguar riskun e korrupsionit.
Theksojmë se Bali, sipas kontratës do të bëjë disa gërmime, pastrime shkurresh, do të hedhë një shtresë asfalt dhe do heqë vijat e bardha. Ndërsa shuma prej 600 milionë lekësh filtrohet në rrjetën e korrupsionit para se të shtrohet rruga.
Duket se Suli nuk paska frikë nga hetimi. Kryebashkiaku i Kamzës, Rakip Suli është paraqitur më 6 nëntor 2023 në SPAK për tu marrë në pyetje.
SPAK po kryen verifikime për veprat “Ushtrim i ndikimit të paligjshëm”, “shpërdorim detyre”, “shkelje e barazisë në tendera” dhe korrupsion, pas kallëzimit të banorëve të Kamzës. Rakip Suli më 11 shtator është denoncuar edhe nga këshilltarët e koalicionit Bashkë Fitojmë në Kamëz, duke iu referuar raportit të KLSH-së pas kontrollit në bashki, por edhe njoftimit dhe zhvillimit të mbledhjeve të këshillit bashkiak online. Nga hetimet ka rezultuar se ka disa raste të abuzimeve me kompensimet e fondit të rindërtimit.
