Një situatë alarmante paraqitet në rrugën “Azem Hajdari” në Durrës, ku mbetjet urbane në koshat e plehrave nuk janë mbledhur prej ditësh.
Grumbujt e mbeturinave kanë krijuar një situatë të rëndë higjieno-sanitare, ndërsa mbetjet nuk kufizohen vetëm te koshat.
Banorët raportojnë se ato hidhen edhe në kanalin e hapur pranë zonës, duke rritur rrezikun e bllokimit të tij.
Situata është kthyer në një shqetësim serioz për komunitetin, veçanërisht për shkak të erës së rëndë dhe ndotjes së krijuar.
Banorët shprehen të shqetësuar për pasojat që kjo gjendje mund të ketë në shëndetin publik.
Sipas qytetarëve, problematika është e përsëritur dhe pavarësisht sinjalizimeve të bëra në drejtim të mediave, deri më tani nuk ka pasur një ndërhyrje për pastrimin e zonës nga ana e Bashkisë Durrës.
Banorët kërkojnë marrjen e menjëhershme të masave për largimin e mbetjeve dhe pastrimin e kanalit, për të shmangur përkeqësimin e situatës dhe rrezikun e krijimit të një vatre ndotjeje.
Ndërkohë, situata ngre pikëpyetje edhe mbi menaxhimin e mbetjeve në qytet, në një kohë kur për trajtimin dhe incinerimin e tyre shpenzohen fonde të konsiderueshme publike.
