Qeveria është alarmuar nga përdorimi i dronëve për thyerjen e sigurisë së burgjeve dhe ka vendosur të instalojë një sistem të posaçëm antidron në të gjithë institucionet e ekzekutimit të vendimeve penale të vendit. Agjencia Kombëtare e Shoqërisë së Informacionit ka hapur një tender me vlerë 207.6 milionë lekë ose 2.1 milionë euro për kontraktimin e privatit që do të ndërtojë sistemin antidron.
“Vitet e fundit, zhvillimi teknologjik ka sjellë përdorimin e gjerë të dronave. Fatkeqësisht, disa individë ose edhe grupe kriminale kanë shfrytëzuar potencialin e dronave për qëllime të paligjshme, përfshirë kontrabandën në burgje dhe rrezikun e transportimit të eksplozivëve, spiunazhit dhe thyerjen e privatesisë,” thuhet në dokumentat e AKSHI-t për justifikimin e tenderit.
Shqipëria ka 21 Institucione të Ekzekutimit të Vendimeve Penale, ku 6 prej tyre janë të sigurisë së lartë. Sipas qeverisë, përdorimi i dronave ka sjellë disa efekte negative në burgje duke përfshirë kalimin e materialeve të ndaluara, rrezikimin e sigurisë deri në arratisjen e të burgosurve si dhe ndërhyrje operacionale në aktivitetet e burgjeve.
Kamerat nuk mjaftojnë
Qeveria thotë se Institucionet e Ekzekutimit të Vendimeve Penale (IEVP) në Shqipëri vuajnë nga mungesa e një infrastrukture të specializuar dhe pajisjeve moderne për parandalimin dhe neutralizimin e dronave. Kjo mungesë i lë këto institucione të cenueshme ndaj rreziqeve që paraqesin Dronat e paautorizuar.
Sistemi aktual i sigurisë mbështetet kryesisht në dy elemente: mbikëqyrjen fizike nga rojet dhe sistemin e kamerave të mbyllura (CCTV), të cilat operojnë 24 orë në 7 ditë të javës.
“Megjithatë, këto metoda tradicionale kanë kufizime të dukshme. Faktori njerëzor në mbikëqyrje është i prirur ndaj gabimeve, lodhjes dhe kufizimeve të perceptimit, veçanërisht gjatë turneve të natës ose në kushte të dobëta shikueshmërie. Nga ana tjetër, sistemet CCTV, ndonëse ofrojnë mbulim të vazhdueshëm, shpesh nuk janë të mjaftueshme për të zbuluar dhe identifikuar Dronat e vegjël dhe të shpejtë, sidomos në distanca të mëdha ose në kushte atmosferike të pafavorshme” thuhet në dokumentet e tenderit.
Gjithashtu sistemi i CCTV është konfiguruar në kënd optik të caktuar që nuk lejon vëzhdgimin e dronave flutures por eshte I drejtuar ne pika te tjera interesi.
“Mungesa e teknologjive specifike antidron, si sistemet e detektimit dhe bllokimit për dronat, e bën praktikisht të pamundur parandalimin efektiv të incidenteve me dronë. Kjo situatë krijon një boshllëk të konsiderueshëm sigurie, duke lejuar potencialisht futjen e sendeve të ndaluar, survejimin e paautorizuar, apo edhe tentativa për arratisje,” vlerëson qeveria. Ndaj sipas saj, modernizimi i sistemeve të sigurisë në IEVP-të shqiptare, me fokus të veçantë në teknologjitë antidron, është bërë një nevojë urgjente për të përballuar këtë sfidë në rritje të sigurisë.
