30 plumba kallashnikovi u qëlluan gjatë natës në fasadën e kompanisë farmaceutike “CFO Pharma” në Tiranë.
Nga kamerat rezulton të jetë qëlluar nga një makinë, e cila u largua në drejtim të mbikalimit të Kasharit.
Pronari i biznesit, Nadir Çausholli pretendoi se nuk kishte probleme dhe nuk dinte kush janë autorët.
Por, përse dikush do të kryente një sulm të armatosur ndaj një kompanie, kur në mes nuk ka asnjë problem?
Burime të Albeu.com bëjnë me dije se sulmi mund të jetë kryer për shkak të borxheve të marra me fajde, nga të paktën dy grupe të ndryshme kriminale, njëri prej të cilave është ai i Ervis Martinit.
Sipas burimeve biznesmeni Nadir Çausholli ka marrë hua nga Ervis Martini në vlerë 13 milion euro, hua e cila nuk është shlyer.
Një version të ngjashëm të kësaj historie, e ka dhënë edhe gazetari Artan Hoxha, i cili në një dalje televizive, ka folur në lidhje me sulmin ndaj CFO Pharma.
