Vizita e presidentit të FSHF, Armand Duka, në komunën e Bujanocit, u shënua jo vetëm nga pjesëmarrja në një turne për fëmijë në Luginën e Preshevës, por edhe nga një reagim i tifogrupit “Tifozat Kuq e Zi”, i cili shprehu hapur pakënaqësinë ndaj bashkëpunimit të FSHF-së me Serbinë.
Gjatë turneut që u organizua me mbështetjen e FSHF-së, në një nga fushat sportive të zonës, tifozët kuqezi shpalosën një banderolë me mesazhin: “Jo bashkë me shtetin që na mohon, jo Euro 2027 me Serbinë.”
Kjo pankartë përbën një protestë të drejtpërdrejtë ndaj vendimit të FSHF-së për të bashkorganizuar me Federatën Serbe të Futbollit finalet e Kampionatit Europian U-21 në vitin 2027.
Reagimi i “Tifozëve Kuq e Zi” nuk është i ri. Që prej momentit kur u zyrtarizua ky bashkëpunim rajonal, grupi i njohur i tifozëve shqiptarë ka mbajtur një qëndrim të ashpër kundër përfshirjes së Shqipërisë në një projekt të përbashkët me Serbinë, duke e konsideruar të papranueshëm bashkëpunimin me një shtet që vazhdon të mohojë të drejtat e shqiptarëve në Luginë.
Ky qëndrim i TKZ, apo edhe i grupimeve të tjera si “Plisat” apo “Ballistët” dukshëm ka bezdisur Federatën Shqiptare të cilët nga ana e tyre janë “hakmarrë” duke i përjashtuar ata nga ndeshjet e fundit të Kombëtares, e fundit kundër Serbisë në “Air Albania”.
