Prokurorja e Tiranës Eranda Laze, e njohur gjithashtu si motra e ish-deputetes së Partisë Socialiste, Ermonela Felaj është shkarkuar nga detyra nga Kolegji i Posaçëm i Apelimit.
Vendimi u shpall të martën, më 29 korrik, pas pranimit të shumicës së shkaqeve të ankimit ndaj vendimit të mëparshëm për konfirmimin e saj në detyrë.
Sipas KPA, Laze dhe bashkëshorti i saj nuk arritën të justifikojnë burimet financiare për pagesën e këstit të parë dhe të fundit të një apartamenti në vlerën e 40 mijë eurove. Po ashtu, trupi gjykues evidentoi mungesë provash për të ardhurat nga avokatia të bashkëshortit, për të cilat nuk rezulton të jenë paguar detyrimet tatimore përkatëse.
Në fokus të hetimit ishte edhe një ngastër toke e dhuruar bashkëshortit të saj, për të cilën prokurorja nuk dha shpjegime bindëse lidhur me marrëdhënien me dhuruesit. Gjithashtu, nuk u justifikua as investimi i përbashkët në një garazh në zonë turistike, i kryer nga babai i bashkëshortit dhe një shtetase tjetër, ndonëse ai jeton në Itali.
Një tjetër pikë e ngritur nga KPA ishin udhëtimet e Laze me persona të dyshuar si të përfshirë në veprimtari kriminale. Edhe pse nuk u konsideruan penalizuese, këto fakte u vlerësuan si tregues të papërgjegjshmërisë dhe ndikuan në vendimin për shkarkim.
Në përfundim, KPA e vlerësoi si të pamjaftueshëm justifikimin e pasurisë nga ana e subjektit të rivlerësimit dhe rrëzoi vendimin e mëparshëm të Komisionit të Pavarur të Kualifikimit, duke vendosur largimin e saj nga sistemi i drejtësisë.
Kujtojmë se më 8 nëntor të vitit të kaluar, KPK e kishte konfirmuar në detyrë Eranda Lazen, duke pranuar pjesërisht shpjegimet e saj për një bilanc negativ prej 10 milionë lekësh dhe për udhëtimet me persona të dyshuar. Pakica në atë rast kishte vlerësuar se shpjegimet nuk ishin bindëse për dy apartamente të blera në Tiranë për rreth 81 mijë euro dhe për një automjet, ndërsa Operacioni Ndërkombëtar i Monitorimit kishte rekomanduar ankim ndaj vendimit.
Në fund, Kolegjit i Posaçëm i Apelimit e konsideroi vendimin e KPK-së si të pabazuar dhe i dha fund qëndrimit të Eranda Laze në sistemin e drejtësisë.
