Mijëra përdorues në vende të ndryshme të botës kanë hasur vështirësi në përdorimin e shërbimeve të Microsoft, pas një ndërprerjeje që preku platformat Outlook, Microsoft 365 dhe Teams.
Problemet zgjatën për më shumë se një orë dhe u raportuan në disa shtete, mes tyre SHBA dhe Itali. Përdoruesit patën vështirësi kryesisht në hapjen e postës elektronike dhe aksesimin e shërbimeve të tjera të kompanisë.
Sipas të dhënave të faqes Downdetector, e cila monitoron ndërprerjet e shërbimeve online, rreth orës 18:00, sipas orës lokale italiane, ishin regjistruar mbi 130 mijë raportime për probleme me Outlook vetëm në Shtetet e Bashkuara.
Ndërkohë, mbi 46 mijë përdorues kishin raportuar vështirësi me Microsoft 365, ndërsa rreth 3 mijë të tjerë kishin hasur probleme në përdorimin e Teams. Numri real i personave të prekur mund të jetë më i lartë, pasi raportimet vijonin të shtoheshin.
Microsoft konfirmoi se kishte marrë ankesa nga përdoruesit për pamundësinë e aksesimit të postës elektronike përmes shërbimit Exchange Online.
Përmes një njoftimi në rrjetin social X, kompania bëri të ditur se kishte nisur hetimet për të identifikuar shkakun e problemeve, të cilat prekën mënyra të ndryshme të lidhjes me shërbimin në kontinentin amerikan.
Më herët, Microsoft kishte njoftuar se kishte arritur të zgjidhte një ndërprerje të shërbimit Teams, e cila kishte prekur përdoruesit në Amerikën e Veriut. Megjithatë, kompania paralajmëroi se problematika mund të kishte ndikuar edhe në funksionimin e shërbimeve të Microsoft 365 në rajone të tjera.
Deri në momentin e raportimit, Microsoft nuk kishte dhënë një shpjegim të plotë për shkakun teknik të ndërprerjes, ndërsa as numri përfundimtar i përdoruesve të prekur nuk ishte bërë i ditur.
