Një 43-vjeçar shqiptar ka mbetur i plagosur rëndë pas një atentati me armë zjarri në Certosa di Pavia, në Itali. Shqiptari, i cili punonte si murator, është qëlluar nga një automjet në lëvizje, ndërsa ndodhej në shoqërinë e një miku dhe kolegu të tij, gjithashtu shqiptar.
Sipas informacioneve paraprake, 43-vjeçari nuk rezulton të ketë precedentë penalë. Të njëjtën gjë raportohet edhe për mikun që e shoqëronte, ndaj hetuesit nuk përjashtojnë mundësinë që objektiv i atentatit të ketë qenë pikërisht ky i fundit.
Ngjarja ka ndodhur pak para orës 19:30 të së shtunës. Dy shqiptarët sapo kishin dalë nga një lokal, ku kishin qëndruar për të pirë diçka së bashku, dhe po ktheheshin drejt banesave të tyre, ku i prisnin familjarët për darkë.
Miku i 43-vjeçarit e kishte parkuar automjetin në zonën e Conca del Naviglio dhe kishte planifikuar ta shoqëronte atë deri në shtëpi. Të dy u nisën në këmbë drejt parkingut dhe, në momentin që kishin mbërritur pranë automjetit, një makinë kaloi në rrugën Viale del Monumento dhe u hap zjarr ndaj tyre.
Automjeti, marka dhe modeli i të cilit nuk u identifikuan nga dëshmitari i vetëm okular, po lëvizte në drejtim të semaforit në kryqëzimin me ish-rrugën shtetërore 35, të njohur si “dei Giovi”.
Makina uli shpejtësinë, por nuk u ndal dhe as nuk hyri në parking. Nga dritarja e përparme në anën e djathtë, në krahun e pasagjerit, një person që ndodhej brenda saj qëlloi me pistoletë.
Një plumb i kalibrit 7.65 mm goditi 43-vjeçarin në anën e trupit, pranë zonës së ijëve.
Menjëherë pas ngjarjes, miku i tij telefonoi shërbimet e urgjencës, si dhe familjarët e të plagosurit. Megjithatë, pa pritur mbërritjen e ambulancës, familjarët e transportuan vetë me automjet drejt urgjencës së Spitalit Poliklinik San Matteo në Pavia.
Shqiptari mbërriti në spital në gjendje shumë të rëndë. Plumbi i kishte shpuar njërën prej mushkërive, ndërsa mjekët e shtruan në repartin e terapisë intensive. Ai ndodhet me prognozë të rezervuar dhe vijon të jetë në rrezik për jetën.
Menjëherë pas ngjarjes, hetimet u morën në dorë nga Sektori i Hetimit i Drejtorisë së Policisë në Pavia.
Hetuesit po analizojnë pamjet e kamerave të sigurisë në zonë, me qëllim identifikimin e automjetit nga i cili u qëllua dhe personave që ndodheshin brenda tij.
Dyshohet se në makinë kanë qenë dy persona: drejtuesi i automjetit dhe autori i të shtënave. Pas atentatit, automjeti dyshohet se ka vijuar lëvizjen drejt semaforit në rrugën shtetërore, ku ka marrë kthesën djathtas në drejtim të Milanos.
Deri më tani, ngjarja dyshohet të ketë lidhje me një larje hesapesh, megjithëse as 43-vjeçari i plagosur dhe as miku i tij nuk rezultojnë të kenë lidhje me qarqe kriminale.
Megjithatë, hetuesit nuk përjashtojnë asnjë pistë. Sektori i ndërtimit nuk është i përjashtuar nga ndërthurja me interesa kriminale dhe dyshohet se njëri prej dy shqiptarëve mund të jetë përfshirë, pa dëshirën e tij, në ndonjë konflikt me persona të përfshirë në aktivitete të paligjshme.
Rrethanat dhe motivet e atentatit mbeten ende të paqarta, ndërsa policia vijon hetimet për identifikimin e autorëve dhe zbardhjen e plotë të ngjarjes.







