Partizani ka zhvilluar ditën e djeshme stër vitjen e radhës në kuadër të përgatitjeve për sfidën e nesërme ndaj Laçit, e vlefshme për javën e 11-të të Kategorisë Superiore. Ndonëse fitoret e ndeshjeve të fundit kanë ngrohur ambientin dhe kanë lënë në hije çdo problem tjetër, duhet thënë se Partizani po vuan shumë dëmtimet e disa titullarëve, që kanë kushtëzuar formacionin javë pas jave.
MBROJTJE ME “ARNA” – Edhe në këtë sfidë situata do të jetë e njëjtë, madje edhe më e vështirë. Altin Bytyçi ka plotësuar numrin e 4 kartonëve të verdhë dhe ndaj Laçit është i pezulluar. Mungesa e tij i shtohet asaj të Sotës, që vijon rikuperimin nga një tërheqje muskulore, dhe Hadrojt, që vijon të ketë probleme me muskujt e barkut. Në këto kushte, sa i përket mbrojtjes, i vetmi titullar në gjendje për të luajtur është Atanaskoski, që meriton elozhe për stabilitetin dhe atë që po jep çdo ndeshje në fushën e lojës. Mungesa e tre titullarëve e detyron skuadrën të “arnojë” tërësisht mbrojtjen. Kujtojmë që përveç tre mbrojtësve, jashtë mbeten ende Mba dhe Da Silva. Sembene është stërvitur me grupin në ditët e fundit, por fakti që nuk luan prej kohësh dhe ende krahun nuk e ka të fortë sa duhet, e bën të mos jetë favorit për titullar.
FORMACIONI – Një gjendje fizike jo maksimale e Valentino Muratajt e bën akoma më të vështirë ndërtimin e formacionit. Mesfushori vuan një lodhje fizike momentale dhe një problem në rrëzat e kofshëve dhe nuk është në gjendje për të luajtur 90 minuta. Kjo e detyron Abilaliajn që në krahun e djathtë të mbrojtjes, të aktivizojë planin C, Zekollin. Nga ana tjetër, në qendër të mbrojtjes pritet të luajnë Preka dhe Koçijan, dy qendërmbrojtës, që deri më tani kanë qenë në plan të dytë apo edhe të tretë. Në mbrojtje në këtë rol do të jetë vetëm Sembene, jo tërësisht i gatshëm. Pjesa tjetër e formacionit pritet të jetë e njëjtë me atë që ka luajtur në ndeshjet e fundit.
