Një aksident detar është regjistruar pasditen e sotme në zonën e Golemit, Kavajë, rreth orës 17:36, në vendin e njohur si “Manhatan”, rreth 800 metra larg bregut, në një hapësirë të përcaktuar për lundrim.
Sipas informacioneve paraprake nga policia, një 25-vjeçar me inicialet S. D., lindur në Çorovodë, është përplasur me motorin e tij të ujit me një tjetër Jet Ski, që drejtohej nga shtetasi P. B., 31 vjeç, lindur në Kosovë.
Si pasojë e përplasjes, P. B. ka pësuar dëmtime dhe është transportuar me urgjencë në spital nga patrulla e Policisë Kufitare që po monitoronte zonën. Fatmirësisht, ai ndodhet jashtë rrezikut për jetën.
Ndërkohë, shtetasi S. D. është shoqëruar në Komisariatin e Policisë për veprime të mëtejshme ligjore.
Nga të dhënat paraprake mësohet se të dy personat ishin duke lundruar bashkë dhe ishin të pajisur me jelekë shpëtimi. Grupi hetimor ndodhet në vendngjarje dhe vijon punën për sqarimin e plotë të rrethanave të aksidentit.
Autoritetet u bëjnë thirrje përdoruesve të mjeteve lundruese të respektojnë rregullat e qarkullimit detar për të shmangur ngjarje të tilla me pasoja për jetën.
