Një përplasje e ndodhur brenda burgut të Fierit ka rikthyer në qendër të vëmendjes konfliktin mes të burgosurit Denis Bajri, alias Brajovic, dhe të shumëkërkuarit Ibrahim Liçi.
Në dëshminë e dhënë për ngjarjen, Bajri ka pretenduar se sulmi ndaj tij në qeli është urdhëruar nga Ibrahim Liçi. Sipas versionit të tij, Aldo Gjini kishte kërkuar ta takonte dhe më pas ishte paraqitur në qelinë e tij së bashku me Jurgen Zotajn.
Bajri ka deklaruar se gjatë takimit, Zotaj i ka dhënë një telefon, në të cilin ishte në linjë Ibrahim Liçi.
“Aldo Gjini kërkoi të më takonte. Erdhi në qelinë time bashkë me Jurgen Zotajn. Zotaj më dha një telefon; në linjë ishte Ibrahim Liçi. Liçi më tha në telefon: “Jeta jote kaq e pati”. Në ato momente, Zotaj tentoi të më sulmonte me thikë”, ka dëshmuar ai.
Ngjarja ka sjellë edhe masa disiplinore ndaj punonjësve të burgut. Komisioni i Disiplinës pranë Drejtorisë së Përgjithshme të Burgjeve ka vendosur përjashtimin e tetë efektivëve të policisë, ndërsa çështja e tyre është referuar në Prokurori për dyshime për shpërdorim detyre.
