Një aksident me pasojë vdekjen e një personi dhe plagosjen e tre të tjerëve është regjistruar mbrëmjen e së shtunës në Gjirin e Lalëzit, ku janë përplasur dy automjete.
Sipas policisë, ngjarja ka ndodhur rreth orës 22:00 dhe si pasojë ka humbur jetën një 57-vjeçar, i cili udhëtonte si pasagjer në njërin prej mjeteve të përfshira në aksident.
Nga përplasja kanë mbetur të lënduar edhe drejtuesit e të dy automjeteve, si dhe një pasagjer tjetër, të cilët kanë marrë ndihmë mjekësore.
Policia thotë se ka arrestuar të dy drejtuesit e mjeteve, pasi nga verifikimet rezultoi se drejtonin automjetet në gjendje të dehur.
Njoftimi:
-Durrës/Rreth orës 22:00, në Gjirin e Lalëzit, janë përplasur dy automjete. Si pasojë ka humbur jetën një 57-vjeçar, i cili ndodhej pasagjer në njërin prej automjeteve. Gjithashtu, kanë marrë lëndime drejtuesit e automjeteve dhe një pasagjer. Në vijim të veprimeve procedurale, u arrestuan në flagrancë drejtuesit e të dy automjeteve, të cilët rezultuan se drejtonin automjetet në gjendje të dehur.
