Rexhep Rraja, djali i ish-deputetit socialist Rrahman Rraja, rezulton të ketë qenë një nga drejtuesit e një rrjeti të trafikut ndërkombëtar të drogës, i goditur me urdhër të SPAK disa ditë më parë.
Sipas dosjes hetimore të SPAK grupet kriminale akuzohen për trafikimin e rreth 2.4 tonëve marijuanë dhe kokainë drejt vendeve të Bashkimit Europian.
Detaje të zbardhura nga dosja tregojnë konkretisht rolet e secilit prej anëtarëve të fisit Rraja në organizatat kriminale, njëri nga të cilat drejtohej prej Rexhep Rrajës, që ërshkruhet si organizatori dhe porositësi i trafikimit të 236 kilogramëve marijuanë, të kapur në doganën e Kapikules në Turqi më 26 janar 2021.
Dosja hetimore zbardh edhe komunikimet mes anëtarëve të grupit, përplasjet dhe dyshimet për tradhti.
Të përfshirë në rrjetin e trafikut të kokainës rezulton të ketë qenë edhe Përparim Rraja, pronari i gurores në Borizanë, dhe Gazmir Rraja, përfshirë shoferin që transportonte lëndën narkotike. Agim Nina ishte lidhja mes shoferit dhe pjesës tjetër të grupit, duke informuar vazhdimisht për lëvizjet e kamionit dhe procedurat në pikën kufitare Edirne–Kapikule, përmes komunikimeve në WhatsApp.
Mëngjesin e 27 janarit 2021, Gazmir Rraja sinjalizon se kamioni kishte hyrë në doganën turke një natë më parë dhe nuk kishte dalë më.
“O vëlla, ajo rruga që patëm nis ka hy mbrëm në dogan nga ora tetë e darkës, na lajmëroi se jam tu hy, ene jan tu më fut në kontroll fizik, tha ai shoferi mo. I ka thën atij pronarit të kompanisë, edhe ma çoi ai lokacionin ene bisedat e të gjitha, domethën ka hy mbrëm në tetë të darkës e nuk ka dale ala. As nuk ka kthe përgjigje asnjë lloj gjëje. Ka çu rob ai sot, e ka ра kamjoni është aty në dogan, mirëpo as në lajme ska dale asnjë gjë, deri nesër tha ju sqaroj”, i shkruan ai.
Gazmir Rraja flet i bindur se drejtuesi i kamionit është arrestuar.
“Nëntëdhjet e nëntë përqind ne menojm se ka ra, a e kupto, se dersa ka hy mbrëm në tet të darkës e ska dal ala prej kontrollit, do të thotë se e kan kap. Mendoj se ka ra, po nesër mo sqarohet sa të dal nëpër media nëpër gjona, të tregojnë edhe lajmet, të gjitha mo, ta shohim se sdim gjë as ne për zotin ala”, vijon ai.
Një ditë më pas, Gazmir Rraja i shkruan Sefës se kamioni ishte kapur pasi shoferi kishte marrë në telefon nusen e vet dhe e kishte njoftuar për arrestimin e tij.
BISEDA:
Gazmir Rraja: Kishte mor shoferi nusen e vet ne tel I kishte thon me kan kap. Te shofim sa ta japin dhe lajmet atje.
Bujar Sefa: gjynah per shoferin vlla
Gazmir Rraja: Se nuk e kan qit hala dhe
Bujar Sefa: ku dro skeni pas fut shum
Gazmir Rraja: Po pra po gjynaf i shkreti Te gjith nga pak Kina pas
